Спартыўнай сталіцы — больш спартыўных аб’ектаў. У Мінску ўрачыста адкрылі Нацыянальны футбольны стадыён. Удзел ва ўрачыстай цырымоніі прыняў і Прэзідэнт Беларусі Аляксандр Лукашэнка. Нягледзячы на святочную нагоду, кіраўнік дзяржавы гаварыў і аб надзённым. 

Першае пытанне — па прыездзе на арэну: «Калі будзем перамагаць?». Прэзідэнта запэўнілі, што найбліжэйшым часам. Недалёка ад уваходу на стадыён-скульптурная кампазіцыя двух футбалістаў. Аляксандр Лукашэнка заўважыў, што тут было б дарэчы размясціць помнік Старшыні КНР Сі Цзіньпіну. Менавіта дзякуючы дамоўленасцям на найвышэйшым узроўні кіраўнікоў Кітая і Беларусі стала магчыма будаўніцтва такой грандыёзнай спартыўнай арэны. Кіраўніку дзяржавы коратка далажылі аб рэалізацыі праекта і перспектывах стадыёна. Важна, што аб’ект пабудаваны ў адпаведнасці з патрабаваннямі міжнародных футбольных арганізацый ФІФА і УЕФА і ўжо распачатая працэдура па атрыманні неабходных акрэдытацый. Прыведзена ў парадак і навакольная тэрыторыя — парк 50-годдзя Вялікага Кастрычніка, пасля рэканструкцыі адкрыты футбольны стадыён «Трактар». Як адзначыў міністр спорту і турызму Сяргей Кавальчук, пра такі стадыён можна толькі марыць. Бо такіх стадыёнаў нават у Еўропе мала.

Новая арэна разлічана на 33 тысячы гледачоў і стане самай вялікай у Беларусі. Стадыён адпавядае ўсім міжнародным стандартам і гатовы прымаць сустрэчы самага высокага ўзроўню. І, канешне, Нацыянальны футбольны стадыён — вельмі прыгожае і красамоўнае пацверджанне сяброўскіх і паважлівых адносін паміж Беларуссю і Кітаем. Таму разам з Прэзідэнтам Беларусі новую арэну адкрыў віцэ-прэзідэнт Алімпійскага камітэта КНР Чжан Цзяшэн. 

Кітайцы нічога проста так не гавораць

На цырымоніі Аляксандр Лукашэнка выступіў з душэўнай прамовай. «Я вельмі шмат разоў, можа дзясяткі, можа сотні разоў праязджаў па нашым Партызанскім праспекце, сёння ён стаў прыгожым, утульным (не заўсёды так было). Праязджаючы па гэтым праспекце, я заўсёды глядзеў на гэты вялізны кавалак нашага Мінска, гэтага парка. А потым, будучы дэпутатам парламента, стаўшы Прэзідэнтам, я не аднойчы бываў у гэтым парку, у раёне нашага стадыёна „Трактар“. І тады зарадзілася шальная думка пабудваваць тут нешта самавітае для гэтага раёна, дзе жылі, і ўпэўнены, жывуць моцныя людзі, працаўнікі, ды і для нашага Мінска. — расказаў перадгісторыю кіраўнік дзяржавы. — А з часам, можа праз 5-7 гадоў, я цвёрда вырашыў, пачуўшы вашу крытыку, што мы нібыта вельмі шмат аддаемся хакею, і будуем для хакея і гэтак далей. Вы памятаеце, да чэмпіянату свету (чэмпіянату свету па хакеі 2014 года — заўв.) мы вымушаны былі будаваць. Я думаю: трэба ж для сваёй прафесіі, маладосці (а мая прафесія — гэта не хакей, а футбол) трэба пабудаваць нам нацыянальны стадыён. Ну калісьці ж наша зборная пакажа клас гульні і будзе гуляць так, як належыць».

Аляксандр Лукашэнка распавёў, што пасля прыняцця рашэння аб будаўніцтве тут футбольнага стадыёна, на перагаворах у Пекіне са Старшынёй КНР Сі Цзіньпінем зайшла размова на гэту тэму. «І ён так па-кітайску, а кітайцы людзі вельмі спакойныя, ураўнаважаныя, у канцы таго, як я падзяліўся з ім думкамі, сказаў: „Мы падумаем“. Я яго не прасіў тады», — распавёў ён. Пасля наступных перагавораў, па словах беларускага лідара, Сі Цзіньпінь прадставіў макеты нацыянальнага футбольнага стадыёна і басейна міжнароднага ўзроўню — падарункі беларускаму народу ад Кітая. «Я адразу не паверыў, добра ведаючы Кітай, кітайцаў, не паверыў. А потым падумаў: кітайцы проста так дарма нічога не гавораць, а тым больш першая асоба. Вось з гэтага ўсё пачалося. Будавалі адносна хутка. Басейн міжнароднага ўзроўню вы бачылі — поўнасцю падарунак кітайскага народа, там няма беларускіх грошай», — сказаў Прэзідэнт.

Аляксандр Лукашэнка зрабіў акцэнт на тым, што гэты найвялікшы помнік адкрыты толькі дзякуючы яго сябру — Старшыні КНР Сі Цзіньпіну. 

Для нашай краіны гэта найвялікшая падзея 

«І вось сёння мы адкрываем гэта грандыёзнае збудаванне. Для нашай краіны, для Беларусі, гэта найвялікшая падзея. Гэтая цудоўная арэна, як і новы басейн міжнароднага ўзроўню, спраектаваныя і пабудаваныя нашымі сябрамі з Кітайскай Народнай Рэспублікі. Я яшчэ раз афіцыйна хачу падзякаваць Старшыні Кітайскай Народнай Рэспублікі Сі Цзіньпіну, а таксама ўсім кітайскім партнёрам, будаўнікам. Хачу падзякаваць за ўзвядзенне самага вялікага і сучаснага футбольнага стадыёна краіны, які спалучае нацыянальныя традыцыі і перадавыя інжынерныя рашэнні», — адзначыў Аляксандр Лукашэнка. Ён таксама падзякаваў і футбалістам, якія прыехалі на матч з Кітайскай Народнай Рэспублікі. Кіраўнік дзяржавы запэўніў, што беларускі бок зробіць усё, каб гасцям тут спадабалася. 

«Перакананы, гэты стадыён стане яшчэ адным вядомым вобразам нашага горада-героя Мінска і сімвалам моцнага беларуска-кітайскага сяброўства. Гэты спартыўны аб’ект адпавядае самым высокім сусветным стандартам. Я спадзяюся, што ў недалёкай будучыні разам з таварыскімі гульнямі і матчамі нацыянальнага чэмпіянату мы зможам прымаць тут афіцыйныя міжнародныя сустрэчы і атрымліваць асалоду ад выступлення найлепшых футбалістаў свету», — заўважыў беларускі лідар.

Прэзідэнт падкрэсліў, што мінчане правялі добраўпарадкаванне прылеглага парка імя 50-годдзя Вялікага Кастрычніка і абнавілі інфраструктуру стадыёна «Трактар». Але, па яго словах, гэта яшчэ не канец. Кіраўнік дзяржавы зрабіў акцэнт на тым, што трэба прыкласці яшчэ шмат працы, каб гэты стадыён патанаў у зеляніне і кветках. Такая задача ўжо пастаўлена кіраўніцтву горада. «Каб гэты зялёны куток сталіцы літаральна за пяцігодку ператварыўся ў сучасны спартыўны квартал для аматараў актыўнага адпачынку», — удакладніў Прэзідэнт.

Футбол сцірае межы паміж краінамі

«Спорт справядліва лічаць паслом міру. Футбол — самая папулярная масавая народная гульня — сцірае межы паміж краінамі, збліжае розных людзей, аб’ядноўвае і тых, хто гуляе, і тых, хто заўзее, — усіх нас. Спадзяюся, узровень гульні нашых клубаў і асабліва зборных будуць адпавядаць створаным для іх умовам», — падкрэсліў кіраўнік дзяржавы. Асобна ён звярнуўся да маладых футбалістаў: «Вы маладыя, вам гуляць, вам адстойваць гонар роднай зямлі. А беларускія футбалісты, атрымаўшы такі падарунак, нарэшце, пачнуць апраўдваць нашы чаканні, і мы ўбачым з гэтых трыбун яркія перамогі любімых каманд». 

Аляксандр Лукашэнка падкрэсліў, што беларусы ўмеюць гуляць у футбол. І заўважыў, што, як трэба пермагаць самых моцных сапернікаў, бліскуча паказала наша мужчынская зборная па пляжным футболе на нядаўнім чэмпіянаце свету. 

«Віншую ўсіх з адкрыццём гэтага цудоўнага збудавання, гэтага стадыёна. Жадаю моцнага здароўя, упартасці і цярпення на шляху да вялікіх спартыўных дасягненняў на карысць нашай Радзімы», — падсумаваў Прэзідэнт. 

Мы напісалі агульную главу беларуска-кітайскага сяброўства

Віцэ-прэзідэнт Алімпійскага камітэта КНР Чжан Цзяшэн падкрэсліў, што дзякуючы двум лідарам — Сі Цзіньпіню і Аляксандру Лукашэнку, адносіны Беларусі і Кітая выйшлі на найвышэйшы ўзровень усепагоднага і ўсебаковага стратэгічнага партнёрства. Ён звярнуў увагу, што нядаўна адбыўся паспяховы візіт Аляксандра Лукашэнкі ў Кітай, падчас якога лідары дамовіліся аб далейшай інтэсіфікацыі беларуска-кітайскіх адносін, быў створаны трывалы фундамент для ўстойлівага і доўгатэрміновага супрацоўніцтва. «Адкрыццё футбольнага стадыёна — гэта не толькі значны праект тэхніка-фінансавага ўзаемадзеяння, але і яркі прыклад палітычнага даверу і глыбокага сяброўства паміж нашымі народамі. Дзякуючы связуючай сіле спорту, мы напісалі новую агульную главу ў гісторыі беларуска-кітайскага сяброўства», — сказаў ён. Чжан Цзяшэн падзякаваў будаўнікам дзвюх краін, якія працавалі над рэалізацыяй праекта. «Упэўнены, што стадыён стане пляцоўкай для натхнення моладзі і новым крокам для ўмацавання гуманітарнага супрацоўніцтва Кітая і Беларусі. Няхай спорт збліжае нас. А наша партнёрства вядзе да агульнай будучыні», — адзначыў ён. 

Чжан Цзяшэн перадаў сімвалічны ключ ад спартыўнага аб’екта Прэзідэнту Беларусі. А ён у сваю чаргу перадаў яго спартсменам. Яны падзякавалі за такі цудоўны падарунак, падтрымку спорту і запэўнілі, што зробяць усё магчымае, каб сваімі перамогамі праславіць родную краіну. «Дзякуй. Мы пачакаем, мы спадзяёмся, што вы ніколі не расстроіце на гэтай цудоўнай арэне. І не толькі на гэтай», — адказаў на гэта Прэзідэнт. 

Гісторыя нацыянальнага футбольнага стадыёна пачалася таварыскім матчам паміж футбольнымі зборнымі Беларусі U-21 і Кітая U-22. За гульнёй назіраў і кіраўнік дзяржавы. 

Валерыя СЦЯЦКО

Фота: Віктар ІВАНЧЫКАЎ і БелТА