«Гэтае свята сімвалізуе мудрасць, згуртаванасць і стваральную сілу, якія рухаюць дзяржаву наперад, захоўваючы вернасць традыцыям. Беларусь з вялікай павагай назірае за высокімі дасягненнямі Султаната і гатовая зрабіць свой унёсак дзеля яго прагрэсу», — гаворыцца ў віншаванні.

Кіраўнік дзяржавы падкрэсліў трывалую сувязь, якая існуе паміж Беларуссю і Аманам. «З асаблівай цеплынёй успамінаю сустрэчы з вамі — у снежні 2024 года ў Маскаце і ў кастрычніку 2025 года ў Мінску. Двухбаковы дыялог стаў па-сапраўднаму гістарычным і пачаў новую старонку ў беларуска-аманскіх адносінах», — адзначыў беларускі лідар.

Аляксандр Лукашэнка звярнуў увагу, што Беларусь і Аман разам заклалі надзейны фундамент для шматпланавага партнёрства — ад нарошчвання тавараабароту ў сферах прамысловасці, сельскай гаспадаркі, харчовай бяспекі, фармацэўтыкі да стварэння сумесных вытворчасцяў. Якасны імпульс атрымала інвестыцыйная дзейнасць, пашырылася ўзаемадзеянне ў сферах культуры, адукацыі і турызму, дадаў ён.

«Усе названыя кірункі адлюстроўвае падпісаная ў кастрычніку 2025 года Дарожная карта па развіцці двухбаковага супрацоўніцтва паміж Рэспублікай Беларусь і Султанатам Аман. Разлічваю на актыўную работу абодвух бакоў па выкананні гэтага праграмнага дакумента пад кіраўніцтвам Сумеснага камітэта па супрацоўніцтве і інвестыцыях», — падкрэсліў Прэзідэнт.

Аляксандр Лукашэнка пажадаў Хайсаму бен Тарэку Аль Саіду здароўя, натхнення і новых поспехаў у служэнні радзіме: «Няхай Султанат Аман і надалей квітнее пад вашым дальнабачным кіраўніцтвам, а сяброўства паміж нашымі краінамі толькі мацнее».