Наша краіна падтрымлівае з расійскім рэгіёнам цесныя гандлёва-эканамічныя і гуманітарныя сувязі, ключавымі кірункамі якіх з’яўляюцца рост тавараабароту, будаўніцтва сумесных прадпрыемстваў і абмен досведам у сацыяльнай сферы. Так, летась узаемны тавараабарот перавысіў 700 мільёнаў долараў, а па выніках першых пяці месяцаў гэтага года прадэманстраваў устойлівы рост — 17,4 %. Менавіта ўмацаванне такога плённага двухбаковага супрацоўніцтва якраз і стала галоўнай тэмай перагавораў Прэзідэнта Беларусі Аляксандра Лукашэнкі і губернатара Калужскай вобласці Уладзіслава Шапшы.

«Каб быў бачны твар Беларусі»

Вітаючы расійскага госця, кіраўнік дзяржавы адзначыў, што з павагай і радасцю прымае калужскую дэлегацыю ў беларускай сталіцы. «Тым больш Мінск для вас не чужы. Вашы сваякі тут у вайну змагаліся. Таму ведаю, што тыя намаганні, якія вы прыкладаеце па абароне гістарычнай памяці, праўды аб Вялікай Айчыннай вайне, звязаны з вашымі ўнутранымі пачуццямі і адчуваннямі, — звярнуў увагу беларускі лідар. — Ваш дзед ваяваў у гады Вялікай Айчыннай вайны, абараняючы нашу вялікую Радзіму. Таму лічыце, што вы прыехалі на сваю зямлю, яна ніколі для вас і не была чужой».

Прэзідэнт падкрэсліў, што адносіны паміж Беларуссю і Калужскай вобласцю развіваюцца нядрэнна, а ў свой час бакі планавалі дасягнуць мільярднага тавараабароту. «Трэба шукаць новыя кірункі з нашай блізкай, роднай Калужскай вобласцю, якая побач. І магчымасці гіганцкія ў вобласці. Я думаю, мільярд — гэта нармальна. Будзем на гэта арыентавацца, — канкрэтызаваў беларускі лідар. — Нашы магчымасці для вас (вы не першы раз у Беларусі) вядомыя».

Гаворачы аб патэнцыяле беларускага боку, Прэзідэнт назваў перспектыўныя кірункі ўзаемадзеяння: «Гэта не толькі і не столькі звычайны гандаль, хоць ён для нас таксама вельмі важны. Мы ўжо навучыліся працаваць у вашай вобласці і гатовыя да будаўніцтва сацыяльных аб’ектаў „пад ключ“, каб быў бачны твар Беларусі. Мы хочам, каб вы ведалі, што ёсць такая блізкая, родная для вас краіна, якая можа матэрыялізаваць усё гэта. Гэта не толькі братэрскія пачуцці, але і вялікая эканоміка».

Беларускі лідар асабліва падкрэсліў неабходнасць развіцця кааперацыйных сувязяў паміж эканомікамі Беларусі і Калужскай вобласці. У прыватнасці гэта датычыцца паставак разнастайнай беларускай тэхнікі, супрацоўніцтва ў галіне сельскай гаспадаркі. «Мы гатовыя да супрацоўніцтва з вамі ў гэтым кірунку, гатовыя пастаўляць вам любую тэхніку», — запэўніў Прэзідэнт.

«Нам трэба займацца канкрэтнай справай»

Нягледзячы на тое што ў Калужскай вобласці нядрэнна развіты аграрны сектар, беларускі бок гатовы пры неабходнасці дзяліцца сваімі напрацоўкамі. «Вопыт малочнатаварных комплексаў, аграгарадкоў, увогуле выбудоўванне структуры сельскагаспадарчай вытворчасці і жыцця людзей у вёсцы. Мы падобныя, клімат у нас прыкладна аднолькавы, — падкрэсліў Прэзідэнт. — Таму мы гатовыя пад ключ стварыць пэўныя комплексы на вялікіх плошчах сельскагаспадарчых угоддзяў, гатовыя паказаць той варыянт, які мы ствараем у Беларусі».

Кіраўнік дзяржавы адзначыў: яго нярэдка крытыкуюць за тое, што ён «стварае маякі ў Беларусі, як у савецкія часы». Размова ідзе аб перадавых гаспадарках, якія становяцца своеасаблівымі ўзорамі для пераймання. Прадугледжваецца, што іншыя сельскагаспадарчыя прадпрыемствы будуць пераймаць іх вопыт.

«Ну а чаму не ствараць прыкладна тое, чаго ты хочаш, каб было ў Беларусі? Таму калі вам гэтыя „маякі“ будуць на карысць... Праўда, крытыкуюць мяне тыя, хто збег з краіны. Гэтаксама, як і расійскім уладам дастаецца ад падобных збеглых. Ну гэта іх справа, хай крытыкуюць, а нам трэба займацца канкрэтнай справай», — сказаў Прэзідэнт.

Кіраўнік дзяржавы пазначыў і такі кірунак, як сельскагаспадарчая тэхніка: «Без тэхнікі нам не абысціся. Працоўных рэсурсаў і ў вас, і ў нас аднолькава не хапае. Таму патрэбная механізаваная сельская гаспадарка. Мы гэтым займаемся і можам падзяліцца з вамі вопытам. Калі вас зацікавіць — скажыце, мы будзем займацца. Абменьвацца досведам заўсёды рады. Мы размаўляем, дзякуй богу, на адной мове і не плануем размаўляць на нейкіх іншых мовах. Гэта вельмі важна. Будзем абменьвацца вопытам, рухацца наперад, у тым ліку вырашаць складаныя задачы, якія ўзнікаюць у ходзе нашай жыццядзейнасці».

Беларуская якасць — традыцыйна высокая

У сваю чаргу губернатар Калужскай вобласці Уладзіслаў Шапша падзякаваў кіраўніку беларускай дзяржавы за магчымасць сустрэчы, згадаўшы тэму захавання памяці аб Вялікай Айчыннай вайне, з якой пачаў Прэзідэнт. Прыкладам крокаў па захаванні гістарычнай памяці ён назваў сумесны беларуска-расійскі фільм Ігара Угольнікава «Бацька Мінай. Партызанская легенда» кінастудый «Ваенфільм» і «Беларусьфільм», здымкі якога праходзілі не толькі ў Беларусі, але ў тым ліку на тэрыторыі Калужскай вобласці. «Мы гэтым ганарымся. Гэта наша гісторыя, гэта павага да гісторыі. Мы будзем рабіць усё для таго, каб гэтую гісторыю ніхто не спрабаваў перапісваць і каб яна была часткай душы нашага генетычнага фонду», — адзначыў кіраўнік расійскага рэгіёна.

Ён падкрэсліў, што і ў сучаснасці трэба прыкладаць намаганні для развіцця і ўмацавання ўзаемаадносін. Бакі імкнуцца рабіць гэта па розных кірунках, уключаючы эканоміку, прамысловасць, сельскую гаспадарку, будаўніцтва. «Гэта тыя сферы, якія найбольш ярка дэманструюць поспех нашага супрацоўніцтва», — канкрэтызаваў Уладзіслаў Шапша.

Бакі ставяць перад сабой амбіцыйную задачу — дасягнуць 1 мільярд долараў у тавараабароце. «Мы да яе энергічна ідзём. Сёння гэта больш за 700 мільёнаў долараў (па выніках мінулага года). За першае паўгоддзе гэтага — рост на амаль 18 % да папярэдніх лічбаў. Гэта добры паказчык. Мы дакладна выйдзем на тыя лічбы, якія разам намецілі», — запэўніў губернатар.

Уладзіслаў Шапша таксама адзначыў, што ў вырашэнні пастаўленай задачы немалую ролю адыгрываюць і пабрацімскія сувязі паміж нашымі гарадамі: «Гэтыя партнёрскія адносіны — якраз рэальныя справы». У якасці прыкладу кіраўнік рэгіёна прывёў супрацоўніцтва ў будаўнічай сферы. Так, беларускія будаўнікі ўзвялі ў Калужскай вобласці паўмільёна квадратных метраў жылля, школы і дзіцячыя садкі. У планах на бліжэйшы час — будаўніцтва новых сацыяльных устаноў. «Якасць высокая. Гэта не асобныя дамы — мікрараёны, прычым высокага класа. Мы іх будуем там, дзе вялікая канкурэнцыя, рынак досыць насычаны і ёсць з чым параўнаць. Заўсёды нязменна карыстаецца попытам на рынку: дамы і кватэры, якія пабудавалі беларусы, прадаюцца вельмі добра», — рэзюмаваў Уладзіслаў Шапша.

Даслоўна

Сферы супрацоўніцтва — розныя

У размове з журналістамі губернатар Калужскай вобласці Уладзіслаў ШАПША расказаў аб перспектыўных кірунках супрацоўніцтва расійскага рэгіёна з Беларуссю. Губернатар звярнуў увагу, што паміж Мінскім аўтамабільным заводам і калужскім прадпрыемствам «Меркатар» склалася паспяховае супрацоўніцтва ў сферы вытворчасці тэхнікі для камунальнай гаспадаркі: «Калі раней у Расію прывозілі платформы, на базе якіх рабілі машыны, то цяпер мы прывозім у Беларусь абсталяванне, і на базе МАЗа робяцца машыны, якія наводзяць парадак на нашых вуліцах».

Размова на сустрэчы таксама ішла аб развіцці сельскай гаспадаркі. У прыватнасці абмяркоўвалася будаўніцтва перспектыўнай фермы, якая будзе цалкам абсталяваная беларускім бокам. «Ферма досыць буйная — каля 1,5 тысячы галоў. І мы разлічваем, што яна будзе візітнай карткай Беларусі ў Расійскай Федэрацыі. А для Калужскай вобласці гэта стане значным унёскам у развіццё сельскай гаспадаркі», — лічыць Уладзіслаў Шапша.

Яшчэ адным кірункам супрацоўніцтва могуць стаць навука і тэхналогіі. «У Обнінску „Расатам“ будуе найбуйнейшы ў Еўропе і першы ў краіне-суседцы завод па вытворчасці радыяфармпрэпаратаў. Гэтыя тэхналогіі дазваляюць дыягнаставаць і лячыць шматлікія захворванні, не толькі анкалагічныя — значны прарыў у навуцы, медыцыне і ў нашым, я ўпэўнены, супрацоўніцтве», — канстатаваў губернатар Калужскай вобласці.

Падчас перагавораў бакі абмяркоўвалі і адукацыйную сферу. «У Калужскай вобласці ствараецца цэнтр сусветнага ўзроўню па падрыхтоўцы спецыялістаў у ядзернай энергетыцы. Гэта сумесны праект Расіі і Беларусі з пункту гледжання будаўніцтва ядзерных рэактараў, але трэба рыхтаваць спецыялістаў для гэтага. Цэнтр ставіць перад сабой амбіцыйныя задачы: рыхтаваць 20 % спецыялістаў гэтага кірунку ад агульнасусветнай колькасці. Мы да гэтага паслядоўна ідзём і гатовыя вучыць у тым ліку дзяцей, якія будуць на тэрыторыі Беларусі будаваць і абслугоўваць ядзерныя энергаблокі, працаваць на іх».

Яшчэ адна сфера — будаўніцтва. «Калужская вобласць сёння, бадай, самы яркі прыклад супрацоўніцтва з Беларуссю ў частцы развіцця будаўнічай галіны. Больш за паўмільёна квадратных метраў жылля ўжо пабудавалі. Гэта цэлыя мікрараёны, якія, дарэчы, карыстаюцца попытам. Нават у такой жорсткай канкурэнцыі сёння мы атрымліваем добрыя вынікі. Гэта і сацыяльныя аб’екты: 10 школ, восем дзіцячых садкоў. Гэта будаўніцтва і развіццё сельскіх тэрыторый. І сёння будаўніцтва жылля для сем’яў на вёсцы, будаўніцтва малых аб’ектаў, будаўніцтва культурна-дасугавых аб’ектаў вядзецца ў нас з дапамогай беларускіх будаўнікоў, і мы за гэта вам удзячныя».

У тэму

Па выніках мінулага года аб’ём узаемнага гандлю паміж Беларуссю і Калужскай вобласцю склаў 705 мільёнаў долараў. Са студзеня да мая гэтага года тавараабарот дасягнуў адзнакі ў 311,4 мільёна долараў, што складае 117,4 % да аналагічнага перыяду мінулага года. Асновай экспарту сталі нафтапрадукты, мэбля і яе часткі, металаканструкцыі з чорных металаў, насенне, смолы і поліўрэтаны, іншыя віды тавараў.

У Беларусь з Калужскай вобласці імпартаваліся пераважна прадукты для кармлення жывёл, палімеры этылену і прапілену, рыбнае філе, алюмініевы дрот і іншае.

Данііл ХМЯЛЬНІЦКІ

---

Дарэчы

Абмеркавалі сумесныя перспектыўныя рашэнні

На Татарстанскім нафтагазахімічным форуме ў Казані, які праходзіў 26 — 28 жніўня, Беларусь была прадстаўлена аб'яднаным стэндам канцэрна «Белнафтахім» — флагманамі айчыннай прамысловасці. Удзел у форуме — чарговая магчымасць для беларускай дэлегацыі, якую ўзначаліў віцэ-прэм'ер Віктар Каранкевіч, абмеркаваць з расійскімі калегамі перспектыўныя сумесныя рашэнні, зверыць гадзіннікі ў пытаннях мадэрнізацыі вытворчасцяў і знайсці новыя пункты судакранання ў сферы высокіх экалагічных і прамысловых стандартаў.

Высокі ўзровень прадстаўніцтва чакаецца з расійскага боку на выстаўцы «ІНАПРАМ. Беларусь»

Аб гэтым расказала на прэс-канферэнцыі першы намеснік дырэктара выставачнага ўнітарнага прадпрыемства «БЕЛІНТЭРЭКСПА» Беларускай гандлёва-прамысловай палаты Ірына ІВАНОВА.

Міжнародная прамысловая выстаўка «ІНАПРАМ. Беларусь» пройдзе ў Мінску з 30 верасня да 2 кастрычніка.

Ірына Іванова расказала, што заяўкі на ўдзел прымаліся яшчэ да заканчэння работы першага «ІНАПРАМа». «Гэта былі звароты як ад удзельнікаў, якія пацвярджалі гатоўнасць выступіць у наступным годзе, так і ад тых, хто па розных прычынах не змог прыняць удзел у мінулым. У гэтым годзе мы правялі маштабную работу па фарміраванні пула ўдзельнікаў, і на сёння заяўлена больш як 500 кампаній», — паведаміла яна.

З расійскага боку чакаецца высокі ўзровень прадстаўніцтва. Сярод пацверджаных удзельнікаў — дзяржкарпарацыі «Растэх» і «Расатам», Расійскі экспартны цэнтр, а таксама прамысловыя гіганты, такія як КАМАЗ. Значная ўвага ўдзелена рэгіянальнай прысутнасці. «На сёння гэта Татарстан, Мардовія, Удмуртыя, Бранская, Чалябінская, Ленінградская вобласці, Санкт-Пецярбург. Усіх мы чакаем са стэндамі», — адзначыла спікер.

Першы намеснік дырэктара ўпэўнена, што для рэгіянальнага прадпрыемства выхад на выстаўку — гэта выхад на вялікую сцэну. «Наша задача — зрабіць гэту сцэну максімальна камфортнай і вялікай. Малы бізнес хоча заявіць аб сабе буйному бізнесу, знайсці інвестараў або партнёраў. Галоўны плюс тут у тым, што ўсе сустракаюцца ў адным месцы і ў адзін час. Гэта эканомія перш за ўсё часу і рэсурсаў», — растлумачыла Ірына Іванова.

Яна ўпэўнена, што выстаўку наведаюць першыя асобы прадпрыемстваў, што пасадзейнічае аператыўнаму заключэнню здзелак. «На сёння свой прыезд пацвердзілі ўжо 29 губернатараў расійскіх рэгіёнаў. Як правіла, губернатары прыязджаюць з буйным бізнесам, які з’яўляецца акном на міжнародную арэну для любога рэгіянальнага прадпрыемства», — дадала яна.

Выстаўка аб’яднае чатыры ключавыя складнікі дзелавога турызму: двухбаковыя перамовы, дэманстрацыю навінак, канферэнцыйную дзейнасць і экскурсійную праграму. У рамках мерапрыемства пройдзе больш за 20 тэматычных канферэнцый і пленарных сесій.

У супрацоўніцтве з расійскімі рэгіёнамі ў Беларусі створаны ўнікальны фармат

Паводле слоў гандлёвага прадстаўніка Расіі ў Беларусі Юрыя ЗАЛАТАРОВА, развіццё рэгіянальнага супрацоўніцтва — адзін з прыярытэтных напрамкаў гандлёва-эканамічнага ўзаемадзеяння дзвюх краін. «У Беларусі створаны ўнікальны фармат. Размова ідзе аб замацаванні службовых асоб за канкрэтнымі рэгіёнамі Расіі. Цяпер 45 службовых асоб Беларусі замацаваны за 82 рэгіёнамі Расіі», — сказаў ён на ўрачыстым адкрыцці выставачнага павільёна Валагодскай вобласці на пляцоўцы Мінскага аддзялення Беларускай гандлёва-прамысловай палаты, якое адбылося на гэтым тыдні.

Паводле слоў гандлёвага прадстаўніка, такі механізм дае магчымасць выбудоўваць прамыя сувязі і падтрымліваць рэгулярнае ўзаемадзеянне паміж рэгіёнамі краін. Прыкладам такога супрацоўніцтва стала і адкрыццё выставачнага павільёна Валагодскай вобласці ў Беларусі. Акрамя таго, пры гандлёвым прадстаўніцтве Расіі ў Беларусі працуюць прадстаўнікі Татарстана, Башкартастана, Смаленскай, Ніжагародскай і Чалябінскай абласцей. Аб гатоўнасці далучыцца да гэтага фармату заявілі Самарская і Тульская вобласці. «Такія праекты будуць садзейнічаць павелічэнню аб’ёмаў двухбаковага гандлю як на рэгіянальным узроўні, так і паміж Расіяй і Беларуссю ў цэлым», — рэзюмаваў Юрый Залатароў.

Як адзначыў генеральны дырэктар Мінскага аддзялення Беларускай гандлёва-прамысловай палаты Сяргей НАБЕШКА, Расія з’яўляецца стратэгічным партнёрам Беларусі па многіх кірунках. Ключавую ролю адыгрывае гандлёва-эканамічнае супрацоўніцтва: каля 70 працэнтаў знешнегандлёвага абароту Беларусі прыпадае на Расію. «Мінскае аддзяленне Беларускай гандлёва-прамысловай палаты ў мінулым годзе правяло больш як 60 мерапрыемстваў з партнёрамі з 39 рэгіёнаў Расіі. Гэта паказвае, наколькі эфектыўнымі з’яўляюцца нашы кантакты», — сказаў ён.

Фота БелТА