Праграму спартыўнага свята адкрыла біятлонная змешаная эстафета каманд вышэйшых органаў улады, удзел у якой прынялі 10 чацвёрак. На старт выйшлі супрацоўнікі ўсіх абласных выканаўчых камітэтаў і Мінгарвыканкама, а таксама Кіраўніцтва справамі Прэзідэнта Рэспублікі Беларусь і Пастаяннага камітэта Саюзнай Дзяржавы. Па-за конкурсам спаборнічала каманда Рэспублікі Мардовія.

Найлепшы вынік паказала чацвёрка Мінгарвыканкама, якую ўзначаліў старшыня Мінскага гарадскога Савета дэпутатаў Арцём Цуран. На другім месцы фінішавалі прадстаўнікі Кіраўніцтва справамі Прэзідэнта, на апошнім этапе бег першы намеснік кіраўніка органа Мікалай Шкрэд. Тройку прызёраў замкнуў квартэт Віцебскага аблвыканкама.

Наступным забегам «Мінскай лыжні — 2026» стане «сНЕЖНАЯ ЭСТАФЕТА», прымеркаваная да Міжнароднага жаночага дня. Пасля поўдня ў «Раўбічах» адбудуцца гонка каманд цэнтральных апаратаў сілавых міністэрстваў і ведамстваў, а таксама эстафета каманд рэспубліканскіх органаў дзяржаўнага кіравання.