25 кастрычніка пройдзе рэспубліканскі суботнік. На сваіх працоўных месцах і на добраўпарадкаванні тэрыторый будзем працаваць усёй краінай. А заробленыя грошы пойдуць на важныя для краіны і кожнага яе грамадзяніна аб’екты — яны звязаныя з нашай гістарычнай памяццю, а значыць, з незалежнасцю і суверэнітэтам нашай краіны.

50 % грашовых сродкаў, якія паступілі, згодна з адпаведнай пастановай Савета Міністраў, будуць накіраваны Міністэрству культуры на будаўніцтва Нацыянальнага гістарычнага музея Беларусі і стварэнне яго пастаяннай экспазіцыі з магчымасцю выкарыстання гэтых сродкаў у 2025—2027 гадах. Палова ж грашовых сродкаў застаюцца ў распараджэнні аблвыканкамаў і Мінскага гарвыканкама з магчымасцю выкарыстання гэтых сродкаў у 2025—2026 гадах.

У рэгіёнах заробленыя на суботніку грошы размяркуюць наступным чынам:

• Брэсцкі аблвыканкам накіруе сродкі на будаўніцтва трэцяй чаргі Рэспубліканскага цэнтра патрыятычнага выхавання моладзі. Ён месціцца на базе Кобрынскага ўмацавання Брэсцкай крэпасці. У час трэцяй чаргі будзе адноўлены заходні форт, дзе размесціцца забаўляльна-асветны комплекс, і добраўпарадкавана прылеглая тэрыторыя.

• На Віцебшчыне сродкі пойдуць на ўзвядзенне стэлы «Орша — горад працоўнай славы. 1941 — 1945». Гэта ганаровае званне сёлета было прысвоена Оршы па рашэнні Савета кіраўнікоў дзяржаў СНД за ўклад у перамогу над фашызмам і працоўны подзвіг жыхароў горада. Цяпер кіпяць работы ў скверы, галоўным элементам якога будзе стэла вышынёй 9 метраў на круглым подыуме. Перад ёй — трохкутная плошча, да якой з розных канцоў сквера вядуць шырокія дарожкі. Папярэдне закладзены электракамунікацыі.

• У Гродзенскай вобласці сродкамі з суботніка прафінансуюць добраўпарадкаванне Жыровіцкага манастыра як духоўнага цэнтра для праваслаўных веруючых і паляпшэнне інфраструктуры самага населенага пункта. Там жа на суботніку будзе працаваць і калектыў Гродзенскага аблвыканкама — плануецца прыбраць занядбаныя пабудовы, дзікарослую расліннасць і разбіць прыгожы парк.

• На Гомельшчыне частка сродкаў, заробленых падчас удзелу ў рэспубліканскім суботніку, будзе накіравана на рэканструкцыю комплексу воінскай славы ў гонар аперацыі «Баграціён» у Светлагорскім раёне.

• У Магілёўскай вобласці заробленыя на суботніку грошы пойдуць на рамонт і добраўпарадкаванне месцаў баявой і воінскай славы ў Шклове — мемарыяльнага комплексу «Памяць», Алеі Герояў і стэлы на левым беразе Дняпра.

• Сродкі, заробленыя на суботніку і пакінутыя ў распараджэнні Мінскага аблвыканкама, будуць накіраваны на распрацоўку праектна-каштарыснай дакументацыі аб’ектаў, што ўваходзяць у склад гісторыка-культурнай каштоўнасці «Гарадзішча «Вал» у Заслаўі. «Пры падрыхтоўцы да абласнога фестывалю „Дажынкі“ пачаліся раскопкі ў гэтым гістарычным месцы, што стала знакавай падзеяй да 1040-гадовага юбілею горада. У перспектыве тут з’явіцца музей пад адкрытым небам. Таксама сродкі будуць накіраваны на закупку медыцынскага абсталявання хірургічнага корпуса абласной клінічнай бальніцы, які будуецца», — расказалі ў Мінаблвыканкаме.

• Сродкі, якія застануцца ў распараджэнні Мінскага гарвыканкама, плануецца выдаткаваць для экспазіцыйнай пляцоўкі ў мемарыяльным комплексе «Трасцянец», у прыватнасці, на рэканструкцыю будынкаў пад інфармацыйны цэнтр экскурсійнага абслугоўвання мемарыяльнага комплексу.

Чытайце таксама: Рэспубліканскі суботнік пройдзе ў Беларусі 25 кастрычніка