На пасяджэнні абмяркоўваліся самыя актуальныя пытанні развіцця Парка высокіх тэхналогій. Сярод іх — рэгістрацыя новых рэзідэнтаў, дзейнасць крыптарэзідэнтаў, падтрымка адукацыі ў ІТ-сферы і многае іншае. 

«Сёлета ўжо больш за 100 кампаній атрымалі статус рэзідэнта ПВТ»

Як адзначыў Прэм’ер-міністр Беларусі Аляксандр Турчын, падчас пасяджэння Назіральнага савета ПВТ быў разгледжаны вялікі пералік пытанняў: «Гэта рэгістрацыя новых рэзідэнтаў, рэгуляванне арганізацыйных пытанняў, дзейнасць крыптарэзідэнтаў, удасканаленне крыптарэгулявання і ініцыятыва па падтрымцы адукацыі ў IT-сферы», — удакладніў Прэм’ер.

Кіраўнік урада з задавальненнем адзначыў, што сёлета ўжо больш за 100 кампаній атрымала статус рэзідэнта Парка высокіх тэхналогій, а яшчэ звыш 40 заявак знаходзіцца ў працэсе разгляду. «Некаторыя пытанні, вынесеныя на пасяджэнне, звязаныя з выкарыстаннем крыптаактываў. Наша задача — разабрацца ў гэтых пытаннях і знайсці збалансаванае рашэнне, якое забяспечыць развіццё крыптакампаній і абароніць эканамічныя інтарэсы дзяржавы», — канкрэтызаваў Аляксандр Турчын.

Адной з галоўных тэм пасяджэння Прэм’ер-міністр назваў падтрымку адукацыі. «Гэта задача актуальная для ўсёй адукацыйнай сферы, але для IT — асабліва. Нашы маладыя людзі таленавітыя, паспяховыя, у іх шмат ідэй і энергіі, і нам трэба дапамагчы ім рэалізаваць свой патэнцыял», — рэзюмаваў кіраўнік беларускага ўрада.

«Прыўносім новыя нормы, якія рэгламентуюць дзейнасць крыптарэзідэнтаў»

Як адзначыла ў размове з журналістамі начальнік сакратарыята Назіральнага савета ПВТ Ганна Рабава, гэты назіральны савет ПВТ чацвёрты па ліку з таго моманту, як яго ўзначаліў Прэм’ер-міністр. «У нас шырокі парадак дня. Акрамя арганізацыйных пытанняў, якія датычацца рэгламенту, мы традыцыйна разглядаем прыём рэзідэнтаў у склад парка. На сёння ў нас на парадку дня прыняцце новых рэзідэнтаў і 14 бізнес-праектаў. У гэтым годзе мы дасягнулі рэкорднай колькасці рэзідэнтаў на прыём пасля 2022 года», — сказала яна.

Пасля нарады з кіраўніком дзяржавы таксама актыўна стала абмяркоўвацца тэма крыптасферы. «У гэтай частцы мы прыўносім новыя нормы, якія рэгламентуюць дзейнасць крыптарэзідэнтаў, у прыватнасці тых, хто з’яўляецца арганізатарам ICO, а таксама некаторыя пэўныя патрабаванні да тэхналагічных платформ, якімі яны карыстаюцца», — падкрэсліла Ганна Рабава.

Яшчэ адзін важны блок праектаў, які таксама ўвесь час на слыху, — адукацыя. «У прыватнасці, адукацыя і падтрымка інавацыйнай моладзі. Сёння вынесена тры такія пытанні, уключаючы падтрымку студэнтаў і навуковай моладзі, а таксама стартап-руху, які з’яўляецца вельмі перспектыўным», — канкрэтызавала начальнік сакратарыята Назіральнага савета ПВТ.

Ганна Рабава звярнула ўвагу на тое, што Парк высокіх тэхналогій з’яўляецца звыклым пунктам прыцягнення для ўсіх інавацыйна актыўных і маладых кампаній. Таму ў ПВТ адзначаецца актыўны прыток рэзідэнтаў. 

Данііл ХМЯЛЬНІЦКІ

Фота БелТА