«Канцэрт-рэквіем — унікальны праект, звернуты да моладзі. Мы ў Беларусі таксама шукаем форму, каб дастукацца да сэрцаў маладых людзей не зусім трывіяльнымі і стандартнымі спосабамі на стыку тэатра, музыкі, унікальных фота- і відэаматэрыялаў. Я вельмі спадзяюся, што ён вам спадабаецца, і хачу запрасіць вас у Беларусь. Прыязджайце, каб лішні раз пераканацца, як наша краіна ставіцца да гістарычнай памяці і спадчыны Вялікай Айчыннай вайны», — сказаў Дзмітрый Крутой.

Кіраўнік Адміністрацыі Прэзідэнта перадаў жыхарам Санкт-Пецярбурга самыя добрыя і шчырыя словы прывітання ад Аляксандра Лукашэнкі, падкрэсліўшы, што ён з вялікай любоўю ставіцца да гэтага горада і яго жыхароў. Дзмітрый Крутой расказаў, што раніцай наведаў Піскароўскія мемарыяльныя могілкі і ў дзень 85-й гадавіны пачатку блакады Ленінграда адчуў асаблівыя пачуцці. 

«Гітлер сваім нялюдскім загадам адмовіў Ленінграду ў існаванні і даручыў знішчыць яго цалкам разам з жыхарамі, каб дэмаралізаваць савецкі народ, нанесці псіхалагічнае, маральнае паражэнне Чырвонай Арміі, таму што з пункту гледжання немцаў Ленінград быў калыскай рэвалюцыі, найбуйнейшым прамысловым цэнтрам і яго знішчэнне магло б змяніць ход вайны. 872 дні бесчалавечнай блакады і паўтара мільёна жыццяў — страшная цана, якую заплаціў горад, але не стаў на калені. У гэтым ёсць вельмі глыбокая, сімвалічная сувязь з тымі трагічнымі падзеямі, якія ў гэты ж час адбываліся на тэрыторыі Беларусі. 1132 дні фашысцкай акупацыі нашай рэспублікі, той жа бесчалавечны план Гітлера, у адпаведнасці з якім 75% жыхароў Беларусі падлягалі поўнаму знішчэнню, частковай эвакуацыі і перасяленню і толькі 25% беларусаў павінны былі застацца ў якасці мясцовых рабоў для немцаў, што перасяляліся на тэрыторыю нашай краіны», — падкрэсліў ён.

Па словах Дзмітрыя Крутога, фашысцкі канвеер смерці на нашай зямлі працаваў фактычна безупынна. Было створана мноства лагераў смерці і гета, загінулі мільёны людзей, у тым ліку мірныя жыхары, былі разбураны гарады і вёскі, многія з якіх паўтарылі трагічны лёс Хатыні. Палова эканомікі Беларусі была цалкам знішчаная. Насельніцтва краіны аднавілася толькі да 1972 года: больш, чым праз 30 гадоў пасля пачатку вайны. Прамысловы і сельскагаспадарчы патэнцыял дзякуючы агульнай дапамозе Савецкага Саюза быў адноўлены раней.

Жыхары Санкт-Пецярбурга на выставе змаглі пазнаёміцца з маштабамі партызанскага руху ў Беларусі, з прыкладамі мужнасці і супраціўлення, якія праявіў беларускі народ.

«Для нас гістарычная памяць — гэта самае галоўнае. Гэтак жа як для Ленінграда 8 верасня — дзень, калі гісторыя горада падзялілася на да і пасля, для нас Дзень незалежнасці Беларусі 3 ліпеня — Дзень вызвалення Мінска ад нямецка-фашысцкіх захопнікаў — дата, без якой не было б нашай рэспублікі», — падсумаваў Дзмітрый Крутой.