У 2025 годзе пры падрыхтоўцы зон масавага адпачынку было ачышчана пяць вадацёкаў і 13 вадаёмаў у Вілейскім, Дзяржынскім, Клецкім, Крупскім, Любанскім, Салігорскім, Стаўбцоўскім, Чэрвеньскім і Уздзенскім раёнах. 

«Праведзены работы па ачыстцы паверхневых водных аб’ектаў ад цвёрдых адходаў і іншародных элементаў, выдаленне небяспечных і патанулых дрэў, ачыстка дна ад глеістых адкладаў, санітарная абрэзка дрэў і кустоў, абкос воднай расліннасці і інш.», — адзначылі ў абласным камітэце прыродных рэсурсаў і аховы навакольнага асяроддзя. 

Па выніках штогадовага рэспубліканскага агляду-конкурсу, які праводзіцца Міністэрствам прыродных рэсурсаў і аховы навакольнага асяроддзя, у намінацыі «Найлепшае добраўпарадкаванне і ўтрыманне зоны адпачынку на водным аб’екце сярод дзяржаўных арганізацый» трэцяе месца заняло УП «Дзяржынская ЖКГ» за падрыхтоўку да сезона адпачынку пляжнай зоны сажалкі вёскі Дзягільна. 

Трэцяе месца сярод водакарыстальнікаў, якія аказваюць паслугі рэкрэацыі і турызму, атрымала ТАА «Дзікая гавань» за добраўпарадкаванне і ўтрыманне зоны адпачынку, размешчанай на Вілейскім вадасховішчы.

«У 2025 годзе ў Мінскай вобласці згодна з рэспубліканскім Планам мерапрыемстваў па правядзенні Года добраўпарадкавання былі ўладкаваны крыніцы ў Бярэзінскім, Дзяржынскім, Клецкім, Нясвіжскім, Стаўбцоўскім і Уздзенскім раёнах. Так, у Дзяржынскім раёне ў адзіным стылі з астатнімі крыніцамі абсталявана Юцкоўская крыніца: устаноўлены каваныя альтанка і ўваходная група, металічныя агароджы, латкі для набору вады з нержавеючай сталі, прыступкі, інфармацыйныя таблічкі, абсталявана пляцоўка для зручнага набору вады з крыніцы, добраўпарадкавана стаянка для аўтамабіляў», — дадалі ў камітэце.

У Нясвіжскім раёне праведзена добраўпарадкаванне крыніцы з купеллю ў вёсцы Качановічы: ачышчана прылеглая тэрыторыя, каналы вытоку ракі Уша, устаноўлены дзве каваныя альтанкі, адна з якіх абсталявана купеллю.