Мабільная версія кітайскай гульні Delta Ops ужо за першыя чатыры дні пасля глабальнага запуску сабрала больш за 10 мільёнаў зарэгістраваных карыстальнікаў, а Wuthering Waves узначаліла чарты бясплатных дадаткаў Apple Store у 107 краінах яшчэ на стадыі папярэдняга заказу. Кітайскія гульні відавочна паскорылі сваё пашырэнне на міжнародных рынках, перадае "Жэньмінь жыбаа" анлайн". 

Па даных Кітайскай асацыяцыі аўдыё-, відэа- і лічбавых выдавецтваў, у першым квартале даходы ад продажаў кітайскіх гульняў за мяжой склалі 4,8 млрд долараў, што амаль на 18 % больш у параўнанні з тым жа перыядам мінулага года. Поспех кітайскіх гульняў за мяжой абумоўлены некалькімі ключавымі фактарамі. Па-першае, актыўная дзяржаўная падтрымка. У дакуменце Міністэрства камерцыі КНР адзначана заахвочванне развіцця гульнявога экспарту, а такія кампаніі, як Tencent, NetEase Games і miHoYo, трапілі ў спісы прыярытэтных экспарцёраў культурнай прадукцыі.

Тэхналагічныя інавацыі сталі другой прычынай поспеху. Напрыклад, падчас стварэння гульні Delta Ops былі выкарыстаны перадавыя тэхналогіі захопу рухаў з 65 прафесійнымі 4K-камерамі і прасторавае аўдыё з больш чым 30 тыс. гукавых узораў. Гульня стала першым кросплатформавым шутарам Tencent, які працуе адначасова на ПК і мабільных прыладах.

Лакалізацыя адыграе ключавую ролю ў дасягненні глабальнага поспеху. У гульні Genshin Impact створаны шматкультурны свет, які складаецца з сямі выдуманых краін. Так, Mondstadt натхнёны сярэднявечнай Еўропай, Sumeru — старажытнай Індыяй і Егіптам, а Natlan адлюстроўвае афрыканскую эстэтыку. Гэта дазваляе гульцам з розных краін пазнаваць знаёмыя культурныя матывы.

Вялікае значэнне мае інтэграцыя традыцыйнай кітайскай культуры: гульні ўключаюць элементы баявых мастацтваў, паэзіі і традыцыйных святаў Паднябеснай. За апошнія пяць гадоў колькасць гульняў, якія змяшчаюць такія элементы, павялічылася амаль утрая. З 2021 года ў гульні Genshin Impact праводзіцца свята Хайдэн, заснаванае на кітайскім Новым годзе і Свяце ліхтароў. Падчас штогадовага свята Вясны ў гульню дадаюць новыя сюжэтныя лініі і элементы, прысвечаныя кітайскім традыцыям. Усё гэта робіць Хайдэн яркай падзеяй, якой з нецярпеннем чакаюць гульцы па ўсім свеце.

Як адзначае прафесар Пекінскага педагагічнага ўніверсітэта Хэ Вэй, кітайскія гульні сталі новай «культурнай візітнай карткай», якая дазваляе свету пазнаёміцца з сучасным Кітаем праз інтэрактыўны лічбавы вопыт.