Яскравым прыкладам з’яўляецца анімацыйны блокбастар «Нэчжа перамагае Цара драконаў» («Нэчжа 2»), які не толькі ўстанавіў рэкорды па касавых зборах, але і выклікаў сапраўдны турыстычны бум. Пасля выхаду фільма месцы, звязаныя з легендарным персанажам Нэчжа, сталі папулярнымі турыстычнымі аб’ектамі. У горадзе Цяньцзінь (Паўночны Кітай), які лічыцца радзімай Нэчжа, былі распрацаваны чатыры тэматычныя турыстычныя маршруты, што прывяло да росту патоку турыстаў на 30%. У іншых месцах, якія асацыююцца з гэтым персанажам, уключаючы парк Чэньтангуань у павеце Сіся (правінцыя Хэнань, Цэнтральны Кітай) і Палац Нэчжа ў гарах Цуйпін горада Ібінь (правінцыя Сычуань, Паўднёва-Заходні Кітай), колькасць турыстаў павялічылася амаль на 300% у параўнанні з аналагічным перыядам мінулага года.

Гэты феномен не абмяжоўваецца адным фільмам. Кінагорад у горадзе Лаалін, што ў правінцыі Шаньдун (Усходні Кітай), дзе здымаўся фільм «Дэтэктыў з Чайнатаўна, 1900 год», таксама стаў папулярным турыстычным напрамкам. Як паведаміла менеджэр Сюй Цяньжуй, нягледзячы на непагадзь, за сем дзён пасля адкрыцця кінагарад наведалі каля 150 тысяч чалавек, а агульная колькасць турыстаў у наваколлях дасягнула 700 тыс. Даходы ад грамадскага харчавання, размяшчэння, транспарту і продажаў мясцовых тавараў значна выраслі, а агульны турыстычны даход перавысіў 90 млн. юаняў.

Падобныя ўсплёскі назіраліся і ў мінулыя гады пасля выхаду такіх фільмаў, як «Паўнаводная чырвоная рака», «Прывітанне, мама» і іншых. Згодна з даследаваннем Кітайскага навукова-даследчага інстытута турызму, 24,5% кітайскіх турыстаў прызналіся, што зацікавіліся раней невядомым ім напрамкам пасля прагляду фільма або тэлеперадачы.

Прафесар Цуй Лі з Другога пекінскага інстытута замежных моў адзначае, што многія пасля прагляду фільма адчуваюць жаданне глыбей пазнаёміцца з культурай, паказанай у карціне, і ператвараюць гэтае жаданне ў рэальнае падарожжа. Такім чынам, кінематограф становіцца магутным інструментам для прасоўвання турыстычных напрамкаў, што адкрывае бязмежныя магчымасці як для развіцця культурнага спажывання ў Кітаі, так і для мадэрнізацыі галіны.