У зоне рызыкі — прыватныя дамы, падворкі, крыніцы пітной вады. Нярэдка падтопленымі аказваюцца артэзіянскія свідравіны, склады хімікатаў і нават малочныя фермы. Усё гэта стварае спрыяльнае асяроддзе для размнажэння бактэрый і вірусаў.

Грызуны і дробныя жывёлы, пераносчыкі многіх захворванняў, ратуючыся ад паводкі могуць трапіць у дамы і гаспадарчыя пабудовы, узрастае рызыка заражэння інфекцыйнымі і паразітарнымі хваробамі.

Дызентэрыя, сальманелёз, брушны тыф, вірусны гепатыт А, ротавірусны энтэрыт і іншыя інфекцыі могуць з сабой «прынесці» вясновыя вады.

Каб не сутыкнуцца з наступствамі паводкі, эпідэміёлагі раяць выконваць простыя, але важныя правілы:

• Не выкарыстоўвайце паводкавую ваду ў бытавых і гаспадарчых мэтах.

• Піце толькі гатаваную або бутыляваную ваду.

• Асаблівая ўвага — студням: калі яны трапілі ў зону падтаплення, піць з іх нельга.

• Агародніну і садавіну старанна мыйце, лепш — абдавайце кіпенем.

• Часцей мыйце рукі з мылам, асабліва пасля вуліцы і наведвання туалета.

• Сачыце за парадкам у двары, не дапускайце збірання смецця.

• Калі вада падтапіла туалет, смеццевы бак або месца прыгатавання ежы, пасля сходу вады абавязкова правядзіце дэзынфекцыю.