Кансерватыўная кааліцыя атрымала больш за дзве трэці месцаў у ніжняй палаце парламента. Гэта канстытуцыйная большасць, якая дае партыі Такаіці магчымасць рэалізаваць свае ініцыятывы без аглядкі на апазіцыю.

Як вынікае з канчатковых вынікаў галасавання, якія прыводзіць японскі грамадскі вяшчальнік NHK, Ліберальна-дэмакратычная партыя Такаіці атрымала 316 мандатаў з 465. Да гэтага ў кіруючай партыі ў ніжняй палаце парламента было ўсяго 198 месцаў, гэта значыць менш за палову. Цяпер яна мае магчымасць пераадольваць вета верхняй палаты і ўносіць папраўкі ў Канстытуцыю.

Гэта першы выпадак з часоў заканчэння Другой сусветнай вайны, калі адна палітычная партыя атрымала больш за дзве траціны месцаў у ніжняй палаце японскага парламента, адзначае NHK, і гэта лепшы вынік для партыі з часоў яе ўтварэння ў 1955 годзе.

Такая пераканаўчая перамога дасць прэм’ер-міністру Санаэ Такаіці магчымасць для прасоўвання сваёй кансерватыўнай палітычнай праграмы, піша Kyodo. Такім значным павелічэннем колькасці месцаў у парламенце партыя шмат у чым абавязана асабістай папулярнасці Такаіці, мяркуе выданне.

Апазіцыйны альянс партый «Камэйта» і Канстытуцыйна-дэмакратычнай партыі страціў больш за 100 мандатаў, да выбараў прадстаўнікі апазіцыі займалі 172 месцы, зараз — толькі 49.

Такаіці пасля публікацыі вынікаў экзітполаў заяўляла, што не плануе праводзіць перастаноўкі ва ўрадзе.