Як было адзначана ў эфіры, вялікая ўцягнутасць у праекты рэальнага сектара эканомікі і работа на вынік — асноўныя патрабаванні Прэзідэнта да навуковай супольнасці. Каб навука стала рэальным драйверам развіцця краіны, задачы кіраўнік дзяржавы паставіў на вялікай нарадзе ў канцы мінулага тыдня. Сёння пасылы дэталёва абмяркоўваюць у навуковых калектывах. 

Так, на сустрэчы з актывам Нацыянальнай акадэміі навук старшыня яе Прэзідыума спыніўся на прыярытэтных кірунках. Быў зроблены акцэнт на тым, што распрацоўкі навукоўцаў неабходныя ў вытворчасці, асабліва ў сферы машынабудавання, сельскай гаспадаркі, медыцыны і сувязі. Даручана падрыхтаваць навукова-тэхнічныя саветы з дзяржрэгулятарамі, будзе таксама рэвізія ўсіх сумесных праектаў. «Тое, што датычыцца інфарматызацыі Міністэрства аховы здароўя, дзе мае значэнне дапрацоўка Аб’яднаным інстытутам праблем інфарматыкі сваіх праграмных прадуктаў, якія выкарыстоўваюцца практычнай аховай здароўя. Гэта цесная работа з Мінсельгасхарчам па, зноў жа, падрыхтоўцы тэхнікі, павышэнні надзейнасці нашай сельскагаспадарчай тэхнікі», — расказаў кіраўнік НАН. 

«Я шчыра не разумею, чаму, маючы каласальны досвед работы з металамі, умацавання металаў, мы досыць простыя камплектуючыя і рабочыя органы закупляем за мяжой. І вось тут, напэўна, гэта якраз няведанне праблем адных і дасягненняў іншых. Гэта трэба ў рамках імпартазамяшчэння ліквідаваць у максімальна кароткія тэрміны», — зрабіў акцэнт Уладзімір Каранік. 

«Кіраўніком дзяржавы было пастаўлена і жорсткае патрабаванне, (якое датычыцца. — Заўв. БелТА) Аб’яднанага інстытута машынабудавання, — гэта работа па павышэнні надзейнасці нашай тэхнікі. І тут напрацовак, кампетэнцый таксама хапае», — падкрэсліў старшыня Прэзідыума Нацыянальнай акадэміі навук.