Кіраўнік НАК пракаментаваў прыемную для краіны тэндэнцыю апошняга часу — беларусаў усё больш дапускаюць да міжнародных стартаў.

Віктар Лукашэнка падкрэсліў, што работа для гэтага была праведзена немалая. «Мы спакойна працавалі, асабліва не прыцягваючы да гэтай увагі. І Нацыянальны алімпійскі камітэт заклаў падмурак для таго, каб прыбраць тую несправядлівасць, якая існавала. Таксама (гэтага ўдалося дасягнуць. — Заўв. БелТА) дзякуючы Міжнароднаму алімпійскаму камітэту. Мы вельмі ўдзячныя тым супрацоўнікам, з якімі працавалі, — яны пайшлі нам насустрач, шмат у чым нам дапамаглі», — падзякаваў ён. Цяпер, па словах кіраўніка НАК, справа за нашымі нацыянальнымі федэрацыямі. «Калі ласка, глеба падрыхтавана, ёсць фундамент — ідзіце і рабіце настройку, дамаўляйцеся са сваімі міжнароднымі федэрацыямі, каб яны далей адкрывалі вам дарогу», — дапоўніў ён.

«Як бачым, нашы федэрацыі дастаткова паспяхова працуюць: многіх ужо дапусцілі, некаторых, як, напрыклад, Федэрацыю хакея, дапусцілі напалову, а па некаторых (кірунках. — Заўв. БелТА), нажаль, пакуль не атрымліваецца прабіць гэты лёд. Але я ўпэўнены, што ўсё будзе добрае. Не будзем ствараць вакол гэтага ажыятаж, працягнем спакойна працаваць у гэтым напрамку», — сказаў на заканчэнне кіраўнік НАК.