«Думаю, што гэта трэба разгледзець», — сказаў ён журналістам, адказваючы на пытанне, ці могуць КПП на граніцы з Беларуссю быць адкрыты раней за 30 лістапада.

29 кастрычніка літоўскі ўрад прыняў рашэнне да 30 лістапада закрыць кантрольна-прапускныя пункты на літоўска-беларускай граніцы. Рух праз пункт пропуску «Шальчынінкай» («Беняконі») поўнасцю закрыты, а праз пункт пропуску «Мядзінінкай» («Каменны Лог») могуць праязджаць толькі асобы, для якіх зроблены выключэнні — дыпламаты і тыя, хто дастаўляе дыпламатычную пошту, а таксама асобы, якія едуць транзітам у Калінінград ці з Калінінграда. Акрамя таго, праз пункт пропуску «Мядзінінкай» могуць вярнуцца ў Літву грамадзяне самой рэспублікі, іншых краін ЕС, а таксама іншаземцы, якія маюць дазвол на часовае пражыванне ў Літве і гуманітарныя візы. У выключных выпадках граніцу могуць перасякаць і іншыя асобы пры пасрэдніцтве МЗС Літвы.