Пажар у прыватным жылым доме ў аграгарадку Аўсянка адбыўся днём 21 лістапада. На момант узгарання малыя 2 і 3 гадоў знаходзіліся адны: іх маці ненадоўга пайшла, каб забраць старэйшых дзяцей са школы. Першым на дапамогу прыйшоў сусед, які заўважыў пажар. Не вагаючыся, 48-гадовы жывёлавод і бацька некалькіх дзяцей кінуўся ў будынак, ахоплены полымем, знайшоў малых і вынес іх на вуліцу.

На ўрачыстай цырымоніі кіраўнік ведамства Вадзім Сіняўскі ўручыў герою грамату МНС і памятны гадзіннік. Міністр падкрэсліў, што ўчынак простага чалавека, які рызыкнуў жыццём дзеля выратавання дзяцей, бясцэнны.

«Вы ведаеце, на працягу доўгіх гадоў службы мы, беларускія ратавальнікі, людзі ў пагонах, сутыкаемся з рознымі падзеямі, калі нашым калегам даводзіцца рызыкаваць жыццём, прымаць імгненныя рашэнні, звязаныя з забеспячэннем бяспекі людзей. Але гэта робіцца ўсвядомлена, на падставе той прысягі, таго высокага прызначэння, якому прысвячае сябе чалавек у пагонах. Аднак усё гэта цьмянее перад тым, як просты чалавек, які жыве тут, сярод вас, убачыўшы гэту небяспеку, ведаючы аб тым, што там знаходзяцца дзеткі, кінуўся іх ратаваць», — адзначыў Вадзім Сіняўскі.

Афіцэрскі сход МНС аднагалосна вырашыў выдзеліць сродкі з добраахвотнага фонду ў падтрымку Сяргея Шындзікава. Яго ўчынак ужо стаў прыкладам бескарыслівай мужнасці для многіх.