Конкурс пройдзе ў папулярнай дысцыпліне Dota 2. Арганізатары падрыхтавалі насычаную праграму па ўсіх канонах кіберспорту. Каманды будуць змагацца ў класічным фармаце 5×5. Матчы пройдуць у фармаце Bo3 (серыя да дзвюх перамог), а гранд-фінал турніру адбудзецца ў фармаце Bo5 (серыя да трох перамог).

Да ўдзелу запрашаюць каманды з пяці чалавек, якія адпавядаюць наступным патрабаванням: стаж работы ў сферы аховы здароўя не менш за тры месяцы і абавязковае членства ў прафсаюзе. Арганізатары падкрэсліваюць, што галоўнае ў турніры — не толькі перамога, але і магчымасць праявіць сябе, умацаваць камандны дух і атрымаць яркія эмоцыі.

Старшыня Магілёўскай абласной арганізацыі Беларускага прафсаюза работнікаў аховы здароўя Аляксандр Басенка адзначыў, што падобныя мерапрыемствы сталі добрай традыцыяй і карыстаюцца вялікай папулярнасцю сярод работнікаў галіны. «Гэта не першы наш вопыт правядзення такіх турніраў. Падобныя мерапрыемствы знаходзяць вялікі водгук у работнікаў аховы здароўя, асабліва ў моладзі, што спрыяе яднанню калектыву», — падкрэсліў ён.