У 2025 годзе ў Мінскай вобласці ў адной з гаспадарак УП «Барысаўскі камбінат хлебапрадуктаў» было пасеяна 20 га яравой фіялетавай пшаніцы, насенне якой было прывезена з Омскай вобласці. Як адзначаюць спецыялісты, гэты від пшаніцы не толькі мае адрознае ад іншых фіялетавае адценне зерня, але і багаты ўтрыманнем антацыянаў, якія з’яўляюцца прыродным антыаксідантам і дабратворна ўплываюць на здароўе чалавека.

«Было прынята рашэнне аб выкарыстанні фіялетавай пшаніцы для выпечкі хлеба двума хлебазаводамі нашага прадпрыемства — Салігорскім і Вілейскім. Так, у Салігорску была распрацавана рэцэптура хлеба, у якім утрымліваецца 67% прарошчанай фіялетавай пшаніцы, ён атрымаў назву „Хажэўскі зерневы“. А ў Вілейцы наладжаны выпуск хлеба пад назвай „Дар зямлі“ з даданнем 15% прарошчанага зерня гэтага віду пшаніцы», — расказала галоўны тэхнолаг УП «Барысаўскі камбінат хлебапрадуктаў» Таццяна Вярбіцкая.

Характэрна, што назвы для прадукцыі з незвычайным фіялетавым зернем прыдумалі работнікі прадпрыемства. Першыя партыі хлеба з фіялетавай пшаніцай з’явіліся ў продажы ў снежні 2025 года. А яго прэзентацыя і першая дэгустацыя адбылася ў верасні на абласным свяце «Дажынкі», якое праходзіла ў Заслаўі.