Хакеісты «Лакаматыва» дома сустракаліся з «Авіятарам». У пачатку трэцяга перыяду каманды ішлі нараўне, але за пакінутыя 15 хвілін аршанцы засмуцілі гасцей тройчы, пры гэтым захаваўшы сваю браму на замку. У выніку 4:1, каманда з Баранавічаў пацярпела 16-ю няўдачу запар. У папярэдні раз «лётчыкі» здабывалі два ачкі яшчэ ў сярэдзіне кастрычніка.

Таксама 6 снежня «Хімік» на чужым лёдзе выйграў паўночнае дэрбі ў «Віцебска» — 2:1, Усе шайбы матчу былі закінутыя ў большасці. Аўтарам вырашальнага гола ў навапалачан стаў Кірыл Баброўскіх. «Нафтавікі» ўзялі ў віцэ-чэмпіёнаў краіны рэванш за паражэнне ў чацвер (2:3) і перапынілі трохматчавую пераможную серыю «Віцебска».