«У нашай краіне шмат выдатных традыцый. Адна з іх – уручаць у гэтае цудоўнае свята пашпарты маладым грамадзянам нашай рэспублікі. Канстытуцыя – галоўны дакумент краіны, у якім абвешчаныя непарушныя асновы народаўладдзя і найважнейшыя каштоўнасці — імкненне да міру, стабільнасці, згоды. Беларускі народ даражыць магчымасцю жыць і працаваць па законах, цывілізавана адстойваць свае правы і інтарэсы, ствараць умовы для далейшага развіцця», — сказаў выконваючы абавязкі старшыні Гродзенскага аблвыканкама Юрый Караеў.

«За кароткі гістарычны тэрмін незалежнага развіцця мы здолелі зрабіць нашу краіну стабільнай, цывілізаванай, шчаснай, — адзначыў ён. — Таму мы ўпэўнена глядзім наперад, маем выразныя і ясныя арыенціры будучыні».

«Вы бачыце, як актыўна будуюцца новыя бальніцы, школы, дамы, спартыўныя збудаванні, павышаецца турыстычная прывабнасць Гродзеншчыны, — падкрэсліў выконваючы абавязкі старшыні аблвыканкама. — Зусім хутка мы адзначым 80-годдзе Перамогі ў Вялікай Айчыннай вайне. Аддамо даніну памяці тым, хто адваяваў нам права свабодна жыць і ствараць на роднай зямлі. Наша агульная задача — памятаць гераічныя старонкі гісторыі, абараняць, развіваць і праслаўляць сваю Айчыну. Грамадзянін сваёй краіны — гэта перш за ўсё патрыёт. Той, хто любіць Радзіму не на словах, А даказвае гэта справамі і ўчынкамі. Шануе яе законы, атрымлівае новыя веды, старанна працуе, клапоціцца пра родных і блізкіх, усведамляе сваю адказнасць за будучыню.»

Юрый Караеў уручыў пашпарты маладым жыхарам Гродна, якія дасягнулі поспехаў у вучобе, творчасці, спорце, грамадзянскіх ініцыятывах — лепшым прадстаўнікам сваіх раёнаў. «Нягледзячы на юныя гады, вы ўжо дасягнулі важных вынікаў. Вы з тых маладых людзей, чый наглядны прыклад заслугоўвае павагі і пераймання. Адны адзначыліся яркімі поспехамі ў вучобе і грамадскіх справах. Іншыя — праявілі неардынарныя творчыя здольнасці. Трэція — дасягнулі значных спартыўных вяршыняў. 

Улічваючы ваша стараннасць, настойлівасць, мэтанакіраванасць і ўпартасць, няма сумненняў, што наперадзе ў кожнага будуць новыя, яшчэ больш значныя здзяйсненні. Пры гэтым можаце быць упэўнены, што дзяржава падтрымае любыя вашы добрыя пачынанні і ініцыятывы. І калі Канстытуцыя-атрыбут сталасці дзяржавы, то ваш пашпарт сімвалізуе пачатак новага этапу ўжо дарослага жыцця. Гэта значыць, што ўжо не за гарамі час, калі лёсавызначальныя для Беларусі рашэнні вам давядзецца прымаць самастойна, разлічваючы толькі на сябе. Таму памятайце, што з моманту ўручэння гэтага дакумента вы набываеце не толькі новыя правы, але і абавязкі», — з такімі пажаданнямі звярнуўся ён да хлопцаў.

Выконваючы абавязкі старшыні аблвыканкама нагадаў усім словы нашага прэзідэнта аб тым, што на кожным з беларусаў ляжыць адказнасць за лёс краіны. І галоўнае — ва ўсіх ёсць роўныя, спрыяльныя стартавыя ўмовы для таго, каб стаць паспяховымі і мяняць жыццё ў Беларусі да лепшага.

«Памятаеце, у нас заўсёды запатрабаваныя добра адукаваныя, працавітыя, энергічныя, творчыя і таленавітыя маладыя людзі, якія валодаюць пачуццём адказнасці. Менавіта такую моладзь мы бачым сёння. Упэўнены, што, абапіраючыся на нашу Канстытуцыю, мы разам працягнем паспяхова вырашаць дзяржаўныя задачы, упэўнена рухацца да дасягнення дастойнага ўзроўню жыцця ў горадзе, вобласці, краіне,» — выказаў перакананасць Юрый Караеў.

У гутарцы з журналістамі ён адзначыў, што тыя 14-гадовыя школьнікі, якія сёння ва ўрачыстай атмасферы атрымліваюць свае пашпарты, у будучыні будуць працаваць дзеля сваёй краіны, для людзей, якую б прафесію ні выбралі. Яны будуць гонарам і для сваёй сям’і. Пра тое, наколькі значнай падзеяй для дзяцей з’яўляецца гэты дзень, сведчыць асабістая гісторыя адной з супрацоўніц аблвыканкама, якую расказаў Юрый Караеў. Жанчына падзялілася з ім успамінам, як ёй, 14-гадовай, таксама ўручылі пашпарт на абласной урачыстасці, як шчаслівая была яна ў гэты дзень і як ганарыліся дзяўчынкай яе бацькі.

Як падкрэсліў Юрый Караеў, для краіны і народа Дзень Канстытуцыі — гэта праява павагі да свайго суверэнітэту. Чым бліжэй па духу Канстытуцыя да народа краіны, тым вялікую ролю яна гуляе ў развіцці дзяржавы дзеля дабра людзей.

Святочным падарункам удзельнікам урачыстага сходу стаў канцэрт лепшых творчых калектываў Гродзеншчыны.

Фота БелТА