Грамадзяне звярталіся па пытаннях правядзення круглых сталоў з ліквідатарамі наступстваў катастрофы на Чарнобыльскай АЭС, паляпшэнні сотавай сувязі ў сельскай мясцовасці, узаконьванні зямельных участкаў і іншым. 

У прыватнасці, Юрый Караеў падкрэсліў, што ў нашай краіне ўдзяляецца вялікая ўвага чарнобыльцам, і напярэдадні 40-годдзя чарнобыльскай катастрофы ініцыятывы актывістаў Беларускага рэспубліканскага грамадскага аб’яднання ліквідатараў і інвалідаў чарнобыльскай катастрофы будуць падтрымлівацца. Але ўсе абавязковыя працэдуры, якія датычацца ўстаноўкі памятнага знака, павінны быць выкананы ў адпаведнасці з заканадаўствам.

Яшчэ адно пытанне паступіла ад жыхара Гродзенскага раёна, які займаецца развядзеннем авечак і вырошчваннем клубніц — ён прасіў выдзеліць яму зямлю для пашырэння сваёй асабістай падсобнай гаспадаркі. 

Гродзенца турбавала дрэнная сувязь МТС у вёсцы Эймінаўцы, дзе пражываюць яго бацькі.

Жыхарка Вялікай Бераставіцы, маці двух навучэнцаў Вялікабераставіцкай сярэдняй школы, патэлефанавала на прамую лінію са словамі падзякі кіраўніцтву аблвыканкама за вырашэнне пытання з будаўніцтвам басейна ў Вялікай Бераставіцы, якога ўжо даўно чакаюць у гарадскім пасёлку. Тут змогуць далучыцца да плавання як дзеці, так і дарослыя.

Аднаго з тых, хто звярнуўся на прыём, хвалявала пытанне ўкладкі асфальту ў вёсцы, дзе ён пражывае. Юрый Караеў падкрэсліў, што гэта праблема будзе вывучацца і вырашацца зыходзячы з аналізу спецыялістаў, генеральнага плана і гэтак далей — усе гэтыя прыярытэты павінны і будуць выконвацца.

Яшчэ адзін зварот на асабісты прыём тычыўся ўстанаўлення права лічыцца ветэранам Вялікай Айчыннай вайны — жыхарка Бераставіцкага раёна перавезла да сябе свайго бацьку, які ў гады вайны быў працаўніком тылу і ўзнагароджаны медалём «За доблесную працу ў Вялікай Айчыннай вайне 1941-1945 гг.», аднак медаль, які пацвярджае гэта, не захаваўся, як і арыгінал пасведчання да гэтага медаля.. Як адзначыла начальнік упраўлення па працы, занятасці і сацабароны Бераставіцкага райвыканкама Жанна Хвасцюк, ужо адпраўлены запыт у Башкартастан, дзе выдаваўся гэты медаль з пасведчаннем для атрымання дубліката, каб бацька жанчыны змог устаць на ўлік у Беларусі і атрымаць адпаведныя ільготы.

«Сёння адбыўся незвычайны прыём. Звычайна большасць усіх пытанняў датычацца сферы жыллёва-камунальнай гаспадаркі. На гэты раз пытанні былі і іншыя сур’ёзныя пытанні», — адзначыў Юрый Караеў пасля дыялогу з жыхарамі.

Выконваючы абавязкі старшыні аблвыканкама падсумаваў, што назіраецца зніжэнне колькасці зваротаў, паколькі ў большасці выпадкаў пытанні, якія ўзнікаюць у насельніцтва, вырашаюцца на мясцовым узроўні:

— Хачу падкрэсліць, што кожны год змяншаецца колькасць зваротаў грамадзян ва ўсе інстанцыі, гэта сведчыць аб тым, што праблемы вырашаюцца на месцах, на раённым узроўні, бачная вялізная работа спецыялістаў і кіраўніцтва райвыканкама. Куды б я ні прыехаў у раён, відаць, што спецыяліст, які прыйшоў на прыём, даўно ў тэме, падрыхтаваны да яе і настроены менавіта з зарадам, каб вырашыць пытанне грамадзяніна. У гэтым і моцная ўлада, бо яна імкнецца вырашыць праблемы своечасова, не дапушчаючы, каб яны сталі зацяжнымі.

Фота: Пул 4 Рэгіён