Мытнымі органамі Беларусі спынены міжнародны канал пастаўкі з Еўрасаюза на тэрыторыю Расійскай Федэрацыі больш як 637 кг асабліва небяспечнага псіхатропу 4-СМС. Устаноўлены і затрыманы грамадзяне Літвы, Беларусі, Расіі і Украіны, якія маюць дачыненне да гэтага злачынства. Аб гэтым паведаміў афіцыйны сайт мытных органаў Рэспублікі Беларусь.
Партыя псіхатропаў прыбыла на тэрыторыю Беларусі з літоўскага склада праз Латвію. Увозілася ў грузавіку SCANIA, якім кіраваў беларус. Па дакументах жа значылася, што ў машыне перамяшчаліся пасудамыйныя машыны.
Віцебскія мытнікі з пункта пропуску «Грыгароўшчына» ў рамках выкарыстання сістэмы рызык накіравалі вялікагруз на агляд з прымяненнем ІДК. Па выніках атрыманай сканаграмы прынята рашэнне аб надглядзе перамяшчаемага тавару.
Унутры бытавой тэхнікі былі выяўлены фальгіраваныя канверты. Вынята 540 такіх упаковак з расфасаваным асабліва небяспечным псіхатропам па 1 і 1,5 кг. Эксперт пацвердзіў, што гэта 4-СМС.
З улікам таго, што грузавік ехаў далей у Расійскую Федэрацыю, праведзена міжнародная аперацыя па ўстанаўленні ўсіх удзельнікаў злачыннай схемы сумесна з ФМС Расіі.
Пры ажыццяўленні аператыўна-вышуковых мерапрыемстваў і неадкладных следчых дзеянняў расійскімі мытнікамі ва ўзаемадзеянні з ФСБ Расіі затрыманы атрымальнікі буйной партыі псіхатропу — грамадзяне Украіны.
Выяўлена яшчэ 162 кг розных наркотыкаў і псіхатропаў (гашыш, мефедрон, МДМА, клефедрон і інш.), схаваных на тэрыторыі прыватнага домаўладання і ў лясных масівах Маскоўскай вобласці.
Агулам канфіскаваных беларускімі і расійскімі мытнікамі 800 кг псіхатропаў і наркотыкаў хапіла б на 3,1 млн. разавых доз. А кошт такой партыі на чорным рынку дасягае 75 млн. долараў ЗША.
Віцебскай мытняй у дачыненні да групы асоб, якая дзейнічае па папярэдняй змове, узбуджана крымінальная справа. Таксама крымінальная справа ўзбуджана і Цэнтральнай аператыўнай мытняй ФМС Расіі.
Удзельнікам злачыннай групы пагражае пазбаўленне волі тэрмінам да 20 гадоў.
