Ваеннаслужачыя падрыхтавалі для гасцей разнастайную праграму і тэматычныя плошчы, каб навучэнцы маглі даведацца шмат цікавага пра армію, побыт і баявую падрыхтоўку асабістага складу. Для школьнікаў правялі аглядную экскурсію па воінскай часці. На выставе яны маглі ўбачыць узоры экіпіроўкі і рыштунку, узбраення, ваеннай і спецыяльнай тэхнікі, узоры стралковай зброі, сродкаў сувязі. 

Байцы батальёна РЭБ прадэманстравалі навыкі валодання тэхнікай. Вучні таксама змаглі паспрабаваць свае сілы. Напрыклад, жадаючым прадаставілася магчымасць навучыцца карыстацца ружжом. Госці падсілкаваліся наварыстай салдацкай кашай. Завяршылася мерапрыемства ўрокам мужнасці, які правёў ветэран Узброеных Сіл Іван Шульга.

«У многіх узнікае пытанне, што такое радыёэлектронная барацьба. Для простага разумення, гэта ўключае ў сябе выяўленне, падаўленне і кантроль радыёэлектронных сродкаў праціўніка, а таксама абарону сваіх сістэм ад варожых уздзеянняў ў радыёэлектроннай сферы. Наш батальён выконвае гэтыя задачы на самых розных узроўнях ад аператыўнага да тактычнага. Па аналізе апошніх узброеных канфліктаў і аперацый, важную ролю па паражэнні аб’ектаў адыгрываюць беспілотныя лятальныя апараты. Адпаведна, на сілы і сродкі РЭБ батальёна ўскладзеныя задачы ў супрацьдзеянні беспілотнікам шляхам радыёпадаўлення каналаў кіравання і перадачы звестак», — растлумачыў камандзір 48-га батальёна РЭБ Вадзім Шкода.

Батальён мае найноўшую тэхніку радыёэлектроннай барацьбы. «Па сваіх тактыка-тэхнічных характарыстыках ёй няма аналагаў у свеце. Гэта станцыі перашкод УКХ- і КХ-дыяпазонаў на базе айчынных аўтамабіляў, мабільныя комплексы радыёманіторынгу, а таксама ўсемагчымыя сродкі радыёэлектроннай барацьбы», — адзначыў камандзір. Ён дадаў, што 48-ы батальён РЭБ нясе службу ў цесным узаемадзеянні з іншымі злучэннямі і воінскімі часцямі Заходняга аператыўнага камандавання.