Паводле звестак літоўскай дзяржаўнай энергетычнай кампаніі ESO, больш за ўсё парушэнняў зафіксавана ў Каўнаскім, Алітускім і Вільнюскім рэгіёнах. «З-за вельмі нізкай тэмпературы правады на паветраных лініях нацягнуліся і абарваліся», — заявіла прадстаўнік ESO па сувязях з грамадскасцю Раса Юадкене.

Раніцай у панядзелак без электрычнасці заставаліся каля 10 тыс. спажыўцоў, аднак цяпер іх колькасць скарацілася да 3,5 тыс. Пры гэтым Юадкене папярэдзіла, што ў некаторых месцах магчымыя новыя абрывы ліній. Яна таксама адзначыла, што апошні раз абрывы ліній электраперадачы з-за маразоў фіксаваліся каля 30 гадоў таму.

Паводле інфармацыі Літоўскай гідраметэаралагічнай службы, раніцай 2 лютага ў краіне была зафіксавана самая нізкая тэмпература прыкладна за 30 гадоў. Паводле папярэдніх звестак, раніцай у Шэдуве (у Радвілішкскім раёне) тэмпература знізілася да 34,3 градуса марозу. Моцныя маразы былі таксама ва Укмергу (мінус 34) і Ёнішкісе (мінус 33,9). Папярэдні аналіз архіўных даных паказвае, што апошні раз у Літве яшчэ халадней было прыкладна 30 гадоў назад, у лютым 1996-га, калі тэмпература ў Таўрагнаі ўпала да мінус 35 градусаў.

З-за экстрэмальных умоў надвор’я ў Вільнюсе назіраюцца затрымкі грамадскага транспарту і паломкі транспартных сродкаў, фарміруюцца заторы. Праблемы ўзніклі і ў іншых гарадах. Напрыклад, у Клайпедзе раніцай не змаглі выехаць дзясяткі аўтобусаў. Збоі ў рабоце транспарту назіраюцца і ў Шаўляі.