Па словах Ганны Бычко, той, хто хоча стаць урачом, павінен пачаць рыхтавацца да паступлення нашмат раней за астатніх аднагодкаў. «Я пачала падрыхтоўку з 7-га класа — стала паглыблена вывучаць біялогію, гэта мяне вельмі захапляла. Інтэнсіўна рыхтавацца я стала ў 10-м класе. Гэта былі не толькі ўрокі ў школе, але і індывідуальныя заняткі, а таксама розныя курсы», — расказала яна.

Студэнтка падкрэсліла, што выбар прафесіі ўрача — гэта не проста выбар работы, а пэўнага ладу жыцця. «Я лічу, што ўрач — гэта пакліканне, і неабходна вельмі адказна падысці да выбару гэтай прафесіі. Таму тым хлопцам і дзяўчатам, якія плануюць пайсці ў медыцыну, я параіла б наведаць як мага больш дзён адкрытых дзвярэй у ВНУ, схадзіць на заняткі ў Школу юнага біёлага, на курсы па падрыхтоўцы да паступлення ў нашым універсітэце», — адзначыла Ганна Бычко.

Па словах дзяўчыны, важна выбраць не толькі ВНУ, але і адразу задумацца аб факультэце. «Напрыклад, для педыятрычнага факультэта важная шчырасць і любоў да дзяцей. Я свядома выбрала яго, таму што з ранніх гадоў хацела быць менавіта дзіцячым урачом. Мы шмат даведаемся на занятках, шмат практыкуемся ў новым корпусе ВНУ. Пакуль я канчаткова не вызначылася са спецыялізацыяй, але мяне прываблівае дзіцячая хірургія. Вучобу я сумяшчаю з працай, пасля 3-га курса працую медыцынскай сястрой у РНПЦ дзіцячай хірургіі», — падзялілася студэнтка.

Ганна Бычко — першы ўрач у сваёй сям’і. «Мае бацькі працуюць у сферы эканомікі. Лічу, што неабавязкова быць часткай урачэбнай дынастыі для паспяховага паступлення ў медВНУ. Галоўнае — гэта зацятасць, праца і стрэсаўстойлівасць. Важна разумець, што гэта прафесія не для ўсіх, яна патрабуе высокіх затрат у рабоце і вучобе, трэба цвяроза ацаніць свае сілы», — падкрэсліла пяцікурсніца.