Сярэдняя па Беларусі тэмпература паветра за першы зімовы месяц склала плюс 0,5 градуса, што вышэй за кліматычную норму на 3 градусы. Снежань 2025 года заняў 7-е месца ў шэрагу назіранняў ад самага цёплага да самага халоднага пачынаючы з 1945 года, прычым шэсць самых цёплых снежняў адзначаліся ў гэтым стагоддзі, а самым цёплым быў снежань 2006 года з сярэднямесячнай тэмпературай плюс 2,6 градуса. Станоўчая анамалія тэмпературы паветра знаходзілася ў асноўным у межах ад 2,8 да 3,2 градуса.

У абласным разрэзе найбольшыя значэнні дадатных адхіленняў тэмпературы паветра ад кліматычнай нормы адзначаны ў Віцебскай, Мінскай, Гродзенскай і Брэсцкай абласцях (3,1 градуса), у Магілёўскай вобласці адхіленні былі найменшымі (2,8 градуса).

Сярэдняя тэмпература паветра ўсіх трох дэкад была вышэйшай за норму. Вельмі цёплымі былі першая і другая дэкады з адхіленнем ад нормы 4,5 і 3,8 градуса адпаведна. У трэцяй дэкадзе станоўчая анамалія склала 1,1 градуса.

У дзённыя гадзіны тэмпература паветра ў асноўным вагалася ад слабаадмоўных да слабададатных значэнняў, а ў самыя цёплыя суткі 10-11 снежня павышалася да плюс 7 і вышэй. Максімум тэмпературы паветра за месяц (плюс 10,9 градуса) быў зарэгістраваны на станцыі Высокае 11 снежня. Начныя тэмпературы паветра былі пераважна адмоўнымі, а ў самыя халодныя ночы ў апошняй дэкадзе месяца апускаліся да 10-13 градусаў марозу і ніжэй. Мінімальная тэмпература паветра адзначана на станцыі Маларыта 25 снежня і склала мінус 15 градусаў.

За месяц у сярэднім па краіне выпала 36 мм ападкаў, што склала 81 % кліматычнай нормы. Ападкі па тэрыторыі краіны распаўсюджваліся нераўнамерна. Па большай частцы тэрыторыі краіны выпала 50-100 % кліматычнай нормы ападкаў. Па абласцях больш за ўсё ападкаў адзначана на тэрыторыі Магілёўскай вобласці — у сярэднім 43 мм, або 103 % нормы. Менш за ўсё — на тэрыторыі Брэсцкай вобласці — 21 мм у сярэднім па вобласці, або 50 % нормы.

На працягу ўсяго месяца адзначаўся недабор ападкаў: у першай і другой дэкадзе выпала па 11 мм ападкаў у кожнай, 82 % і 75 % дэкаднай нормы адпаведна, у трэцяй дэкадзе выпала 14 мм ападкаў, 84 % нормы.

Ападкі выпадалі ў выглядзе дажджу, снегу і мокрага снегу. Снежнае покрыва ўтварылася ў сярэдзіне другой дэкады, але яго заляганне было непрацяглым. У трэцяй дэкадзе снежнае покрыва зноў устанавілася і ўтрымлівалася да канца месяца. На апошні дзень месяца максімальная вышыня снегу была зафіксавана на станцыі Мсціслаў і склала 18 см. На працягу месяца назіраліся туманы, галалёдныя з’явы, таксама адзначалася ўзмацненне хуткасці ветру з парывамі да 15 м/с і больш. Максімальная хуткасць ветру адзначана на станцыі Пружаны 28 снежня (21 м/с).