Душэўныя размовы і прыемныя сюрпрызы

Ужо чацвёрты год, як у нашай краіне па ініцыятыве кіраўніка дзяржавы з’явілася і атрымала шырокую народную падтрымку дабрачынная акцыя «Ад усёй душы», закліканая ў дні навагодніх і калядных свят падарыць клопат і ўвагу пажылым людзям. У пятніцу да акцыі далучылася Старшыня Савета Рэспублікі Наталля КАЧАНАВА. Яна сустрэлася з ветэранамі працы Наваполацка ў Тэрытарыяльным цэнтры сацыяльнага абслугоўвання насельніцтва.

Наваполацкі ТЦСАН быў пабудаваны ў 2001 годзе і ахоплівае больш за 18 тысяч чалавек — адзінокіх пажылых грамадзян і інвалідаў, шматдзетныя сем’і і тых, хто выхоўвае дзяцей-інвалідаў, дзяцей-сірот і тых, хто застаўся без апекі бацькоў. Тут дзейнічаюць клубы і гурткі, у рамках якіх рэалізоўваюцца запатрабаваныя адукацыйныя праграмы. Пры аддзяленні дзённага знаходжання для грамадзян пажылога ўзросту працуе гарадскі сацыяльны праект «Інстытут залатога ўзросту». Тут пажылыя грамадзяне могуць праводзіць вольны час, знаёміцца і камунікаваць, займацца творчасцю і атрымліваць прававую і псіхалагічную дапамогу.

Як заўважыла Наталля Качанава, у нашай краіне 1,6 млн грамадзян перасягнулі 65-гадовую мяжу і 600 чалавек ужо адзначылі векавы юбілей. Старшыня Савета Рэспублікі падкрэсліла, што краіна ганарыцца людзьмі, якія заклалі падмурак развіцця нашай дзяржавы, будавалі гарады і прадпрыемствы, рабілі свой унёсак у станаўленне суверэннай рэспублікі. І цяперашняму пакаленню важна захаваць і прымножыць тое, што перададзена ад старэйшых калег.

Удзельнікі сустрэчы цікавіліся, як можна рэалізаваць сябе на пенсіі, дзяліліся вопытам удзелу ў розных аб’яднаннях па інтарэсах, дэталямі арганізацыі турпаездак па Беларусі і Расіі. Наталля Качанава прапанавала ветэранам працы далучыцца да дэпутатаў з Наваполацка і пабываць на экскурсіі ў Савеце Рэспублікі, і яе ідэя знайшла гарачы водгук ва ўдзельнікаў мерапрыемства. Наведвальнікі аддзялення дзённага знаходжання для пажылых грамадзян Наваполацкага тэрытарыяльнага цэнтра сацабслугоўвання насельніцтва прадставілі творчыя нумары. Людзі залатога ўзросту выканалі душэўныя песні, уразілі гасцей танцамі і прачыталі вершы, у якіх ад усяго сэрца падзякавалі за ўвагу і клопат.

«За гады нашай суверэннай Беларусі склалася шмат традыцый, якія мы святкуем і адзначаем. Адна з іх — „Нашы дзеці“. Шмат гадоў ужо па ініцыятыве нашага Прэзідэнта мы ў гэтыя светлыя, святочныя дні, калі адзначаем Новы год і Каляды, віншавалі дзетак. Кіраўнік дзяржавы сказаў, што мы павінны гэтымі днямі сустрэцца не толькі з нашымі дзеткамі, але і з людзьмі, якія ўжо сёння з-за свайго ўзросту маюць патрэбу ў нашай дапамозе, падтрымцы, а магчыма, проста ў сустрэчы для таго, каб пагаварыць і падзякаваць ім за тое, што яны зрабілі для нашай краіны. Дзякуючы гэтым людзям мы сёння жывём у цудоўнай, суверэннай, незалежнай краіне. Сёння атрымалася такая душэўная сустрэча, выдатная. Гэта тыя людзі, якія сапраўды заслугоўваюць павагі», — сказала спікер Савета Рэспублікі.

А ў госці да пацыентаў Гарадскога клінічнага цэнтра паліятыўнай медыцынскай дапамогі Мінска ў рамках дабрачыннай акцыі «Ад усёй душы» прыехалі супрацоўнікі Міністэрства аховы здароўя на чале з міністрам аховы здароўя Аляксандрам ХАДЖАЕВЫМ.

Звяртаючыся да супрацоўнікаў цэнтра, ён адзначыў іх клапатлівае, адкрытае, гатовае падзяліць чужы боль сэрца. «Мы часта шукаем прыклады для пераймання ў навуцы, рэлігіі або філасофіі, але сапраўдная школа чалавечнасці знаходзіцца тут — сярод тых, хто ўмее быць побач у самыя цяжкія хвіліны. Ваша праца нагадвае нам: якім бы моцным ці разумным ні быў чалавек, пакуль ён жыве на Зямлі, усё ў яго руках. Мы павінны тварыць і займацца стваральнай працай не калісьці потым, а тут і цяпер», — заклікаў Аляксандр Хаджаеў.

Акцыя «Ад усёй душы» таксама завітала да пастаяльцаў аддзялення кругласутачнага знаходжання ў Іўеўскім раёне. Міністр юстыцыі Яўген КАВАЛЕНКА наведаў аддзяленне кругласутачнага знаходжання для грамадзян пажылога ўзросту і інвалідаў у вёсцы Лукашына.

Яўген Каваленка выказаў падзяку людзям срэбнага ўзросту за іх уклад у развіццё Беларусі, умацаванне яе суверэнітэту і незалежнасці. Ён таксама адзначыў, што працавітасць, згуртаванасць і патрыятызм старэйшага пакалення служаць прыкладам для беларускай моладзі.

«За вашымі плячыма — багаты жыццёвы і працоўны шлях. У вашых парадах — мудрая праніклівасць і разуменне. І сёння разам з вамі мы працягваем напаўняць летапіс нашай дзяржавы новымі старонкамі. Імкнёмся зрабіць родную Беларусь яшчэ прыгажэйшай і багацейшай», — адзначыў кіраўнік ведамства.

Зімовыя святы цяжка ўявіць без прыемных сюрпрызаў. Міністр юстыцыі ўручыў дырэктару аддзялення кругласутачнага знаходжання Таццяне Радкевіч сертыфікат на бытавую тэхніку, неабходную для паўсядзённай дзейнасці, а кожнаму з яго пастаяльцаў — індывідуальны падарунак. Завяршылася цёплая сустрэча сумесным чаяваннем, падчас якога Яўген Каваленка пагутарыў з пажылымі людзьмі і адказаў на іх пытанні.

Нягледзячы на тое, што дабрачынная акцыя ўжо хутка наблізіцца да свайго завяршэння, збаўляць абароты і спыняцца радаваць пажылых людзей ва ўсіх кутках Беларусі не збіраюцца. Работнікі МНС, напрыклад, днямі зладзілі свята ў пансіянаце «Світанак», парадаваўшы пастаяльцаў выступленнем сабак кіналагічнай службы. А піянеры з мінскай сярэдняй школы № 189 імя А. К. Гараўца разам з першым сакратаром Мінскага гарадскога камітэта БРСМ Аляксеем Пікусам зазірнулі ў госці да 105-гадовага ветэрана напярэдадні яго дня нараджэння ў сацыяльны пансіянат «Выток».

Цуды — побач

Марафон дабрачыннай акцыі «Нашы дзеці» працягнецца да 14 студзеня, а значыць, яшчэ ёсць час падарыць усмешку, радасць і ўвагу маленькім беларусам. Яны, упэўнены, гэтага вельмі чакаюць.

Далучыўся да дабрачыннай акцыі «Нашы дзеці» старшыня Дзяржаўнага мытнага камітэта Уладзімір АРЛОЎСКІ. Ён наведаў Сацыяльна-педагагічны цэнтр Кастрычніцкага раёна Магілёва. Супрацоўнікі мытных органаў звыш пяці гадоў падтрымліваюць выхаванцаў цэнтра — не толькі на Новы год, але і на працягу ўсяго года.

Старшыня Дзяржаўнага мытнага камітэта павіншаваў дзяцей і ўручыў сертыфікат на набыццё абутку, дапоўніўшы яго салодкімі падарункамі. «Мы з задавальненнем удзельнічаем у такой важнай акцыі, як „Нашы дзеці“. Для нас гэта падзея, мы да яе рыхтуемся. У гэтым годзе, акрамя салодкіх падарункаў, падорым сертыфікат на дзіцячы абутак. Нам хочацца дапамагчы і падтрымаць хлопцаў і дзяўчат, у якіх у жыцці нешта не склалася. Персанал установы замяняе ім бацькоў. І мы са свайго боку хочам падтрымаць і выхавальнікаў, і, самае галоўнае, саміх дзяцей», — сказаў ён.

Дзеці адгукнуліся на ўвагу непадробнай радасцю. Завяршылася мерапрыемства сапраўднай казкай ад супрацоўнікаў мытных органаў: для дзяцей выступілі Дзед Мароз і Снягурка, а кожны выхаванец атрымаў салодкі падарунак, які нагадаў, што цуды — заўсёды побач.

Магілёўскі спецыялізаваны Дом дзіцяці для дзяцей з арганічным пашкоджаннем цэнтральнай нервовай сістэмы з парушэннем псіхікі наведала ў рамках акцыі старшыня Дзяржаўнага камітэта па стандартызацыі Алена МАРГУНОВА. Разам з ёй наведаць маленькіх выхаванцаў прыйшлі дырэктар Магілёўскага цэнтра стандартызацыі, метралогіі і сертыфікацыі Сцяпан Дзенісенка, дырэктар Дзяржбудэкспертызы па Магілёўскай вобласці Іван Якушаў і начальнік Магілёўскай абласной інспекцыі Дзяржстандарта Васіль Зайцаў.

Такія сустрэчы сталі ўжо традыцыйнымі. Прадпрыемствы сістэмы Дзяржстандарта як сімвал бескарыслівасці і дабра аказваюць Дому дзіцяці ў Магілёве пастаянную ўвагу і дапамогу.

Алена Маргунова з удзячнасцю адзначыла ўклад персаналу ўстановы ў дабрабыт жанчын, якія выхоўваюць дзяцей-інвалідаў, вырашэнне іх сямейна-бытавых пытанняў, падтрыманне маральнага і духоўнага стану, умацаванне і абарону мацярынства, дзяцінства і сям’і.

«Гэтая работа набывае асаблівую значнасць і прызнанне ў 2026 годзе, аб’яўленым Годам беларускай жанчыны, — падкрэсліла старшыня Дзяржстандарта. — Ад усёй душы жадаю вам невычэрпнай жыццёвай энергіі і сіл, здароўя і дабрабыту. Тое, што вы робіце кожны дзень для дзетак і іх бацькоў, з’яўляецца найвялікшым прыкладам міласэрнасці. Вялікі дзякуй за вашу працу і шчырыя сэрцы!»

Цудоўны падарунак атрымалі маленькія жыхары сталіцы ў рамках акцыі «Нашы дзеці» —у «Мінск-Міры» расчыніла свае дзверы новая школа — сучасны будынак з басейнам, абедзеннай залай і харчаблокам. На вуліцы прадугледжаны пляцоўкі для міні-футбола, баскетбола, валейбола, стрытбола і вялікага тэніса. Ва ўстанове адукацыі створана безбар’ернае асяроддзе для арганізацыі адукацыйнага працэсу дзяцей з асаблівасцямі псіхафізічнага развіцця.

Намеснік старшыні Мінгарвыканкама Андрэй СТРЫГЕЛЬСКІ павіншаваў усіх з мінулымі святамі і адзначыў сімвалічнасць адкрыцця навучальнай установы менавіта ў гэты перыяд — падчас акцыі «Нашы дзеці». «Упэўнены, што для дзяцей тут створаны ўсе ўмовы для атрымання якаснай адукацыі, выхавання, спасціжэння вучэбных прадметаў і станаўлення сапраўднымі патрыётамі і грамадзянамі нашай любімай Беларусі», — адзначыў ён.

Фота БелТА і ТГ-канала mogilevnews.