«Падтрымка стартап-руху з’яўляецца для нас адным з прыярытэтных напрамкаў, паколькі ў гэтым мы бачым вялікую будучыню і значны патэнцыял. Мы ствараем паўнацэнную экасістэму стартап-падтрымкі і стартап-руху. На базе Парка высокіх тэхналогій ёсць стартап-цэнтр, дзе мы фарміруем гэту экасістэму комплексна. Пачынаем з падтрымкі маладзёжнага руху, з работы ў ВНУ, дзе супрацоўнікі дапамагаюць студэнтам уключацца ў інавацыйнае прадпрымальніцтва. Выкарыстоўваюцца механізмы фінансавання — развіццё венчурнай індустрыі. У гэтай частцы Паркам высокіх тэхналогій запушчана ўжо другая хваля Венчурнай акадэміі па фарміраванні венчурных інвестараў. Гэта вельмі важна: патрэбны і людзі, якія фарміруюць праекты, і тыя, хто гатовы ў іх інвесціраваць. Задача ПВТ — сфарміраваць экасістэму, каб яны знаходзілі адзін аднаго, — расказаў Дзмітрый Калечыц. — У выніку мы хочам, каб з гэтага інавацыйнага маладзёжнага прадпрымальніцтва выраслі прадпрыемствы-мільённікі, кампаніі, якімі б ганарылася краіна. Па сутнасці, надзея на тое, што ў выніку развіцця гэтай экасістэмы могуць з’явіцца свае «аднарогі».

Падтрымка стартап-сістэмы заключаецца ў тым, што ПВТ забяспечвае сустрэчу інвестараў з носьбітамі ідэй або праектаў. «На ўзроўні ВНУ з моладдзю працуюць адпаведныя супрацоўнікі, і мы падтрымліваем тых, хто вядзе гэту ініцыятыву. Пасля таго як фарміруецца кампанія, якая ўжо разумее сваю ідэю і вырысоўвае прадукт, мы бяром гэтыя каманды ў наш стартап-цэнтр. Цяпер там каля 30 каманд, работу пачалі ў мінулым годзе. З імі працуюць нашы спецыялісты, юрысты, фінансісты, каб удасканаліць іх веды і дапамагчы сфарміраваць паўнацэнную кампанію», — растлумачыў першы намеснік начальніка.

Адначасова ПВТ запусціў Венчурную акадэмію, дзе ёсць патэнцыяльныя інвестары — паспяховыя беларускія прадпрымальнікі, у якіх ёсць магчымасці і жаданне фінансаваць перспектыўныя праекты.

«Парк высокіх тэхналогій адкрывае фінансаванне для падтрымкі стартап-руху ў кожнай ВНУ. У нас 13 ВНУ-партнёраў, пагадненне з якімі мы вызначылі сумесна з Міністэрствам адукацыі. Цяпер ідзе актыўная работа па запуску гэтага руху», — адзначыў Дзмітрый Калечыц.

Адукацыйныя стыпендыі — гэта асобны напрамак, нядаўняя ініцыятыва Назіральнага савета Парка высокіх тэхналогій. «Выдзяляюцца стыпендыі таленавітым студэнтам і выкладчыкам. Ужо сфарміравана база, будуць праводзіцца конкурсы. Студэнты 1-2 курса IT-спецыяльнасцей могуць удзельнічаць: яны прадстаўляюць інфармацыю пра сябе, эсэ, свае поспехі ў галіне IT, пасля чаго адукацыйны савет парка адбірае прэтэндэнтаў, а Назіральны савет адабрае стыпендыі», — сказаў ён.

Другі блок — падтрымка выкладчыкаў праз гранты, якія таксама ідуць праз Парк высокіх тэхналогій. Выкладчыкаў будуць адбіраць адукацыйныя саветы вышэйшых навучальных устаноў. Гэта дадатковая падтрымка, якая павінна садзейнічаць развіццю IT-адукацыі ў Беларусі.