Па даных следства, 23-гадовы жыхар Аршанскага раёна зарэгістраваўся ў якасці індывідуальнага прадпрымальніка і актыўна прасоўваў паслугі па рамонце мабільных тэлефонаў, у тым ліку разблакіроўку iCloud для iPhone. Для гэтага ён арандаваў у сталіцы памяшканне і публікаваў аб’явы ў інтэрнэце. Мужчына абяцаў вырашыць праблему ў самыя кароткія тэрміны, забіраў дарагія тэлефоны і аплату за работу. Але ў абумоўленыя даты ён прылады не вяртаў, пераносіў тэрміны рамонту, а затым зусім пераставаў выходзіць на сувязь з кліентамі.

Як удалося ўстанавіць сталічным следчым, у рэчаіснасці мужчына тэхніку не рамантаваў, а прадаваў. Атрыманыя грошы ён траціў на асабістыя патрэбы. У сакавіку гэтага года незадаволеныя кліенты сталі звяртацца ў праваахоўныя органы. За некалькі месяцаў устаноўлена 30 пацярпелых, а сума нанесенай ім шкоды перавысіла 34 тыс. рублёў. 

Ілжэпрадпрымальніку прад’яўлена абвінавачванне па ч. 3 арт. 209 (махлярства, здзейсненае ў буйным памеры) КК. У цяперашні час устанаўліваецца дачыненне мужчыны да здзяйснення аналагічных злачынстваў. «Калі вы пацярпелі ад супрацьпраўных дзеянняў дадзенага мужчыны альбо валодаеце інфармацыяй аб іншых эпізодах злачыннай дзейнасці, просьба паведаміць пра гэта па тэлефоне: 8 (017) 347 47 02», — звярнуліся да грамадзян следчыя.