Кармянская зямля ўжо шмат гадоў асацыюецца з ільном. Гэтую культуру тут апрацоўваюць з любоўю і павагай. А разам з аграрнымі тэхналогіямі працягваюць і ўмацоўваюць народныя традыцыі старажытнага рамяства. У раёне ёсць магутнасці па прамысловай перапрацоўцы гэтай культуры.

Фестываль лёну кожны раз збірае сотні і тысячы гасцей з розных куткоў Беларусі, а таксама блізкага замежжа і стаў брэндам раёна. Гэтым гарачым суботнім днём у цэнтры Кармы фестывальнае льняное шэсце аб’яднала сотні кармян розных пакаленняў.

Сімвалічная карусель пад навясным шатром з рознакаляровых сцяжкоў разгарнулася на цэнтральнай плошчы вакол маштабнага слупа, абвязанага лёнам з уплеценымі кветкамі. Упрыгожваннем гэтай кампазіцыі традыцыйна з’яўляецца фігура міфічнай дзяўчыны Клюсымкі - свайго роду берагіні льняных палёў. Спрадвеку верылі, што менавіта гэтая сціплая прыгажуня шмат стагоддзяў таму перадала людзям насенне лёну. Карагод аб’яднаў і творчыя калектывы, дэлегацыі з іншых рэгіёнаў і краін. Аўтэнтычнасці шэсцю дадалі дзяўчаты і дзяўчынкі ў касцюмах з натуральных матэрыялаў.

Старшыня Кармянскага райвыканкама Дзмітрый Шынкарэнка вітаў гасцей фестывалю на ўрачыстым адкрыцці свята. Ён распавёў, што «Ільняная карусель» пастаянна развіваецца і пашыраецца. Кіраўнік раёна акцэнтаваў: лён — адзін з сімвалаў дабрабыту і мірнай працы, увасабленне духоўнай і матэрыяльнай культуры беларускага народа. Нямногія расліны заслужылі такую пашану — упрыгожваць афіцыйную эмблему Дзяржаўнага герба Рэспублікі Беларусь.

Цёплы прывітальны адрас удзельнікам і гасцям фестывалю накіраваў старшыня Гомельскага аблвыканкама Іван Крупко. «Ужо дзявяты раз закружылася „Льняная карусель“, аб’ядноўваючы ўсіх, каму дарагія беларускія традыцыі, народная творчасць і прыгажосць роднага краю. Гэта адно са святаў, у якіх асабліва ярка раскрываецца душа беларускай зямлі, дзе кожная песня гучыць як памяць продкаў, кожнае рамяство захоўвае векавую мудрасць, а кожная льняная нітка злучае мінулае і сучаснасць. Менавіта такім стаў фестываль „Ільняная карусель“ — прыгожы, душэўны, напоўнены павагай да гісторыі свайго краю і шчырым гонарам за людзей, якія ўмеюць захоўваць і працягваць лепшыя традыцыі продкаў. Менавіта таму такія святы маюць асаблівую каштоўнасць. Яны аб’ядноўваюць пакаленні, дапамагаюць моладзі адчуць сувязь са сваімі каранямі, а кожнаму з нас — яшчэ раз усвядоміць, наколькі багатая і самабытная Беларуская культура», — указаў ён, павіншаваўшы ўсіх з гэтым святам.

На адкрыцці фестывалю галоўны сімвал «Ільняной каруселі» — сноп — перавязалі вышытым ручніком старшыня Кармянскага раёна Дзмітрый Шынкарэнка і старшыня раённага Савета дэпутатаў Таццяна Шэхцер.

Гасцей свята рады сустракаць на інтэрактыўных пляцоўках «Ільняная карчма», «Ільняны гастрафэст». Самых актыўных і завадных удзельнікаў чакаюць на майстар-класах па беларускіх бытавых танцах, ільноткацтве, прадзенні, вырабе сувеніраў, дзе гасцінна зазываюць знатакоў спрадвечна народнага і аўтэнтычнага падворка.

На ўвесь дзень у Карме вырас цэлы фестывальны квартал, дзе размясціліся гандлёвыя рады, інтэрактыўныя пляцоўкі, майстар-класы, фотазоны, дзіцячы гарадок атракцыёнаў і іншае. Усё пра ільняныя ўзоры можна даведацца на лакацыі «Роднае. Моднае». Лепш даведацца пра этапы традыцыйнага цыкла вырошчвання і перапрацоўкі лёну можна на пляцоўцы «Ад зерня да рушніка». Хлебасольна сустракаюць і традыцыйныя беларускія падворкі ў «Ільняной вёсцы» — «Хлебны», «Крупяны», «Бульбяны», «Капусны», «Травяны». А моладзь запрашаюць на актыўнасці — вывучыць рухі сучасных танцаў «ІльноДэнс». Немагчыма сысці без сувеніра з выставы-продажу вырабаў дэкаратыўна-прыкладнога мастацтва, майстроў рамеснікаў «Горад майстроў». На лакацыях — каля сотні майстроў.

Гулянні працягнуліся да позняга вечара.

Ужо шмат гадоў арганізатарам свята выступае Кармянскі райвыканкам. Ільнофестываль накіраваны на развіццё турыстычнага патэнцыялу раёна, прапаганду духоўных каштоўнасцей і традыцый народнай культуры, павышэнне прэстыжу працы льнаводаў, а таксама на захаванне і прымнажэнне гісторыка-культурнай спадчыны нашых продкаў і прыцягненне цікавасці моладзі да гісторыі раёна і краіны ў цэлым. Адна з галоўных ідэй фестывалю — як мага бліжэй пазнаёміць гасцей і ўдзельнікаў свята з культурай, традыцыямі і звычаямі льнаводства, якія склаліся на працягу многіх стагоддзяў.