«Сітуацыя ў гаспадарках стабільная, уражанне станоўчае. На двух прадпрыемствах гатоўнасць энерганасычаных трактароў, агрэгатаў для апрацоўкі глебы набліжаецца да стапрацэнтнага паказчыка, своечасова набываюцца запчасткі. Магчыма, дзесьці не хапае механізатараў, але, тым не менш, уласнымі сіламі гатоўнасць да правядзення палявых работ забяспечана. Калі гаварыць пра МТК, то ў абодвух прадпрыемствах гэта сучасныя комплексы, дзе якасць утрымання буйной рагатай жывёлы адпавядае ўсім тэхналагічным рэгламентам, якасць кармоў — таксама. На сёння такія гаспадаркі блізкія да ўзорных у Віцебскай вобласці», — адзначыў Ігар Пятровіч.

У Пастаўскім райвыканкаме Старшыня Палаты прадстаўнікоў правёў асабісты прыём грамадзян, на які запісалася звыш трох дзясяткаў чалавек.

Жыхарка горада Паставы паскардзілася на суседа, які на працягу некалькіх гадоў злоўжывае алкаголем і вядзе асацыяльны лад жыцця. У лютым мінулага года пасля звароту заяўніцы на прамую лінію ў Палату прадстаўнікоў органы міліцыі на пэўны час забяспечылі спакой у суседняй кватэры, паставілі адрас на кантроль, аднак мужчына-інвалід зноў стаў парушаць грамадскі парадак. «Я вам абяцаю, што гэтага грамадзяніна будуць трымаць на пільным кантролі органы РАУС і прадстаўнікі МНС. Падстаў для яго прымусовага высялення няма», — сказаў Ігар Сергяенка.

Людзі звярталіся таксама з просьбай дапамагчы ў асфальтаванні ўчастка дарогі ад аграгарадка Камаі да вёскі Муляры і паляпшэнні стану дарогі ад трасы Полацк — Вільнюс да вёскі Груздава; паспрыяць у падключэнні электраацяплення ў шматкватэрным доме, дзе адсутнічае неабходная магутнасць электрычнасці; звярнуць увагу на якасць паслуг грамадскага транспарту ў горадзе Паставы. Адразу некалькі зваротаў былі прысвечаны тэме пенсіённага забеспячэння (а канкрэтна — няправільна налічанай, на думку заяўнікаў, пенсіі), добраўпарадкавання дваровых тэрыторый і дзіцячых пляцовак у горадзе, рамонту мясцовых школы і дзіцячага садка. Адзін заяўнік узняў тэму магчымасці замацавання на заканадаўчым узроўні пытанняў крэдытавання фізічных асоб, якія вядуць асабістую падсобную гаспадарку, але афіцыйна не працуюць. Яшчэ адно пытанне датычылася зямельнага заканадаўства. Мужчына прасіў разгледзець сітуацыі і ўнесці папраўкі ў існуючы закон: ці лічыцца незаконным захопам зямлі ўсталяванне электрапастуха падчас выпасу жывёлы? Як урэгуляваць канфліктныя сітуацыі з паляўнічымі на землях сялянска-фермерскай гаспадаркі, якія аддадзены пад паляванне? Як аказваецца дапамога сельгаспрадпрыемству ў выніку пашкоджання яго земляў падчас правядзення вучэнняў, арганізаваных Міністэрствам абароны?

Усе агучаныя праблемы Старшыня Палаты прадстаўнікоў узяў на асабісты кантроль да іх канчатковага вырашэння. «Прыёмы грамадзян дазваляюць зрабіць своеасаблівы зрэз надзённых праблем насельніцтва, убачыць, што хвалюе людзей. Падводзячы вынікі сённяшняга дня, гэта пытанні пенсіённага забеспячэння, добраўпарадкавання гарадскіх і сельскіх тэрыторый, правядзенне электраацяплення. Некаторыя звароты ляжаць у плоскасці міжасобасных канфліктаў. Тым не менш кожны чалавек быў пачуты і яму была аказана дапамога», — заключыў Ігар Сергяенка.

Фота ТГ Палаты прадстаўнікоў