Як падкрэсліў Ігар Сергяенка на сустрэчы з Эрболам Султанбаевым, за перыяд незалежнасці абедзвюх дзяржаў у двухбаковым фармаце зроблена нямала, актывізаваны дыялог на вышэйшым узроўні. Ігар Сергяенка заўважыў, што добрыя давяральныя адносіны склаліся і паміж кіраўнікамі дзяржаў, праходзяць рэгулярныя сустрэчы на розных міжнародных пляцоўках, арганізавана ўзаемная падтрымка. «Асабліва гэта важна ва ўмовах турбулентнасці і ваенна-палітычнай напружанасці», — падкрэсліў спікер.
Ігар Сергяенка павіншаваў кіргізскіх партнёраў з рэалізацыяй адказнай місіі — старшынствам у АДКБ у бягучым годзе. «Разлічваем таксама на актывізацыю супрацоўніцтва на пляцоўцы ШАС з улікам нашага новага статусу ў гэтай арганізацыі. Неабходна і ў далейшым аказваць адзін аднаму падтрымку і на іншых міжнародных пляцоўках. Хацеў бы таксама разлічваць на актывізацыю нашага супрацоўніцтва на ўзроўні груп дружбы», — сказаў ён.
Асобную ўвагу Старшыня Палаты прадстаўнікоў звярнуў на тое, што 2025 год — год 80-годдзя Вялікай Перамогі — асаблівы як для Беларусі, так і для Кыргызстана, сыны якога змагаліся ў радах Чырвонай Арміі і ўдзельнічалі ў вызваленні Беларусі. Іх памяць свята шануюць у нашай краіне У Мінску ўстаноўлены помнік і названа вуліца ў гонар Героя Савецкага Саюза Джумаша Асаналіева, які гераічна загінуў пры вызваленні Віцебскай вобласці. «Ваш вядомы зямляк, кіргізскі і савецкі пісьменнік Чынгіз Айтматаў увёў ва ўжыванне слова „манкурт“ для абазначэння чалавека, які страціў сувязь са сваімі гістарычнымі, нацыянальнымі каранямі, забыўся пра сваё радство», — заўважыў Ігар Сергяенка, дадаўшы, што наша задача сёння — не стаць манкуртамі, якія не памятаюць сваю радзіму, сваю гісторыю.
Эрбол Султанбаеў у сваю чаргу падкрэсліў, што Кыргызстан разглядае Беларусь у якасці аднаго са сваіх важных партнёраў у знешняй палітыцы. Ён заўважыў, што сёння супрацоўніцтва паміж краінамі развіваецца практычна па ўсіх напрамках, у тым ліку і ў палітычнай сферы. «Добрае ўзаемадзеянне склалася і паміж парламентамі. Мы разлічваем на прадаўжэнне міжпарламенцкіх кантактаў. Вы добрую ініцыятыву вылучылі адносна груп дружбы. Мы гатовы актывізаваць работу і ў гэтым напрамку», — падкрэсліў Эрбол Султанбаеў.
У тэму
Намеснік старшыні Пастаяннай камісіі па правах чалавека, нацыянальных адносінах і сродках масавай інфармацыі Палаты прадстаўнікоў Алег Раманаў у размове з журналістамі падкрэсліў, што паміж Беларуссю і Кыргызстанам устаноўлены канструктыўныя адносіны. «Кыргызстан праводзіць прагматычную, канструктыўную знешнюю палітыку, накіраваную на ўмацаванне стабільнасці ў рэгіёне. І для нас гэта таксама важна. Таму што цэнтральнаазіяцкі рэгіён, у якім знаходзіцца Кыргызстан, няпросты рэгіён, гэта крыніца многіх патэнцыйных пагроз. І палітыка Кыргызстана накіравана на іх мінімізацыю, што таксама важна для Беларусі», — сказаў ён. Парламентарый падкрэсліў, што Беларусь і Кыргызстан плённа супрацоўнічаць на міжнародных пляцоўках СНД, ЕАЭС, ШАС і іншых. Станоўчую дынаміку маюць і эканамічныя адносіны. «Адносіны паміж парламенцкімі структурамі таксама маюць прадуктыўны характар. Кантакты паміж парламентарыямі адпавядаюць той дынаміцы адносін, якая назіраецца паміж нашымі краінамі», — падсумаваў Алег Раманаў.
