З 25 удзельніц кваліфікацыі ў вырашальны турнір прабіліся 12 спартсменак — адна беларуска, чатыры кітаянкі, тры амерыканкі, дзве прадстаўніцы Аўстраліі і па адной дзяўчыне з Канады і Германіі. За першы скачок фіналу Гуськова атрымала 86,44 бала, за другі — 100,29. Найлепшая з дзвюх спроб прынесла Ганне восьмае месца, у суперфінал ступіла наймацнейшая шасцёрка. Да праходу далей нашай фрыстайлістцы не хапіла 5,7 ачка.

У мінулым сезоне Кубка свету лідар беларускай каманды выступіла на трох этапах Кубка свету і на кожным з іх стала дзявятай. Гуськова з’яўляецца алімпійскай чэмпіёнкай Пхенчхана-2018 і сярэбраным прызёрам Гульняў 2022 года ў Пекіне.

Усяго ўдзел у жаночых спаборніцтвах па лыжнай акрабатыцы ў Лівінья прынялі тры беларускі. Па выніках кваліфікацыі Анастасія Андрыянава паказала 16-ы вынік, Ганна Дзяруга размясцілася ўслед за ёй. XXV зімовыя Алімпійскія гульні завершацца 22 лютага.