Каб пазбегнуць выплаты мытных плацяжоў, грамадзяне Літвы ўвозілі на тэрыторыю ЕАЭС транспартныя сродкі, афармляючы на сябе іх часовы ўвоз. У далейшым у аўтамабілях відазмяняліся ідэнтыфікацыйныя нумары кузаваў, а таксама выкарыстоўваліся падробленыя нумары і пасведчанні аб рэгістрацыі. Так іншамаркі мелі намер уцягнуць у незаконны эканамічны абарот на тэрыторыі Расіі і Беларусі.

Такім чынам праз пункты пропуску «Беняконі» і «Каменны Лог» былі ўвезены OPEL 2006 года выпуску, VOLVO 2002 года і два MERCEDEZ-BENZ 2001 і 2000 года выпуску. Іх агульны кошт склаў каля Br80 тыс., а сума мытных плацяжоў, якія падлягаюць выплаце, — звыш Br135 тыс.

Устаноўлены ўдзельнікі супрацьпраўнай схемы: 53-гадовы літовец — арганізатар і яго памагатыя — грамадзяне Літвы і Беларусі.

Гродзенскай рэгіянальнай мытняй распачата крымінальная справа па прыкметах учынення злачынства, прадугледжанага ч. 1 арт. 231 КК. Санкцыяй артыкула прадугледжана пакаранне аж да пазбаўлення волі на тэрмін да трох гадоў.