Фігуранткай па крымінальнай справе праходзіла 33-гадовая жыхарка абласнога цэнтра, якой былі інкрымінаваныя падробка афіцыйных дакументаў і іх выкарыстанне, у тым ліку паўторна.

Згодна з матэрыяламі справы, маючы непагашаную судзімасць за звязаныя з незаконным абаротам наркотыкаў злачынствы, мінулым летам гамяльчанка падрабіла не менш за два рэцэпты ўрача. 

«У прыватнасці, у бальнічныя бланкі, набытыя незаконным шляхам, жанчына ўнесла загадзя лжывыя звесткі аб выпісцы лекавых прэпаратаў урачом паліклінікі. Затым наклеіла фрагменты паперы з адбіткамі пячаткі і подпісам урача. Выкарыстоўваючы падробленыя дакументы, абвінавачаная з 17 па 23 чэрвеня 2025 года абышла некалькі аптэк у розных раёнах Гомеля, дзе набыла лекі, дазволеныя да рэалізацыі толькі па рэцэпце ўрача», — расказалі ў абласной пракуратуры.

Злачынную кемлівасць гамяльчанкі раскрылі ў адной з аптэк. Так, урач з Гомеля падчас водпуску атрымаў паведамленне з фота незвычайнага рэцэпту ад сваёй сястры-работніцы аптэкі. «Жанчына адразу звярнула ўвагу на рэцэпт, выпісаны на бланку дзіцячай паліклінікі, у якой гэты ўрач ніколі не працаваў», — растлумачылі ў пракуратуры.

На судзе фігурантка прызнала сваю віну і патлумачыла, што лекі ўжывала сама. Паводле медыцынскага заключэння, яна пакутуе наркаманіяй і мае патрэбу ў прымусовым лячэнні.

З улікам прадстаўленых дзяржабвінаваўцам доказаў суд Цэнтральнага раёна Гомеля вынес абвінаваўчы прысуд. Жанчыне прызначана пакаранне ў выглядзе пазбаўлення волі на адзін год з адбываннем у папраўчай калоніі ва ўмовах агульнага рэжыму з прымяненнем прымусовых мер бяспекі і лячэння ад наркаманіі.

Прысуд не ўступіў у законную сілу, можа быць абскарджаны і апратэставаны ў апеляцыйным парадку.