Футбалісты нацыянальнай зборнай Беларусі атрымалі трэцюю вікторыю запар у таварыскіх матчах, паведамляе БелТА.

На полі «Барысаў-Арэны» беларусы абгулялі каманду Казахстана з лікам 4:1.

Пасля праліўнога дажджу, які на паўгадзіны затрымаў пачатак гульні, сапернікам прыйшлося патраціць час, каб прылаўчыцца да слізкага газона. Гэта лепш удалося гаспадарам: на 25-й хвіліне сустрэчы памылкай абароны гасцей скарыстаўся Валерый Грамыка, а яшчэ праз 5 хвілін мэты дасягнуў далёкі ўдар Валерыя Бачарава. Неўзабаве пасля перапынку брамнік і абаронцы казахстанскай зборнай зноў згулялі няўзгоднена, і Трафім Мельнічэнка забіў трэці мяч. Пасля гэтага гаспадары збавілі абароты, чым на 75-й хвіліне гульні скарыстаўся Галымжан Кенжэбек. Прапусціўшы мяч, падапечныя Карласа Алоса зноў актывізаваліся, і неўзабаве пасля класнай перадачы Віталя Лісаковіча Яўген Шыкаўка чацвёрты раз уразіў вароты гасцей. Для яго, як і для Бачарава, гэта першыя галы ў складзе галоўнай каманды краіны.

• На старце гэтага сезона падапечныя Карласа Алоса выйгралі два выязныя спарынгі. Спачатку ў Душанбэ беларускія футбалісты разграмілі каманду Таджыкістана — 5:0, а Баку ўпэўнена перайгралі азербайджанцаў — 2:0.

На наступным тыдні, 10 чэрвеня, зборная Беларусі сустрэнецца ў Мінску са зборнай Расіі. Гэта будзе апошняя праверка перад стартам у адборачным турніры чэмпіянату свету. Увосень беларуская каманда згуляе ў кваліфікацыйнай групе С разам з футбалістамі Грэцыі, Даніі і Шатландыі.