Акрамя праактыўнага фармату прызначэння пенсіі па інваліднасці (пенсія прызначаецца аўтаматычна, як толькі ў інфармацыйных сістэмах фіксуецца надыход пэўнай жыццёвай падзеі. — Заўв. БелТА), у Беларусі развіваюць сэрвісы, прывязаныя да жыццёвых сітуацый грамадзян. «Адна з такіх сітуацый — нараджэнне дзіцяці. На ўзроўні міжведамаснага ўзаемадзеяння мы ствараем комплексны лічбавы сэрвіс: пры нараджэнні дзіцяці можна будзе зарэгістраваць яго па месцы жыхарства і ў ЗАГСе, а таксама ініцыяваць прызначэнне дапамог у сувязі з нараджэннем і сямейных выплат», — расказала Юлія Берднікава.

Іншая важная сітуацыя — страта блізкага. «Сёння гэта складаная папяровая працэдура, але разам з Міністэрствам юстыцыі мы прыступілі да яе лічбавай трансфармацыі. Гэта атрыманне даведкі аб смерці ў электронным выглядзе, рэгістрацыя пасведчання аб смерці ў ЗАГСе і ініцыяванне выплаты дапамогі на пахаванне», — заўважыла яна.  

У самы бліжэйшы час сумесна з Міністэрствам аховы здароўя Мінпрацы ўкараніць электронны лісток непрацаздольнасці — гэта дазволіць адмовіцца ад традыцыйнага папяровага «зялёнага лістка», які работнікі прад’яўляюць работадаўцам. «У гэтым годзе запланавана комплекснае тэсціраванне для прызначэння дапамог па цяжарнасці і родах, каб спрасціць і паскорыць працэдуру. Пры паспяховым укараненні тэхналогію маштабуем на ўсю рэспубліку і іншыя віды часовай непрацаздольнасці», — падзялілася яна планамі.