У бліжэйшыя дні Дзяржкаммаёмасць павінна адзначыць 35-годдзе. Віталь Нявера падкрэсліў, што камітэт пазіцыянуе сябе як адно з самых маладых ведамстваў у краіне.

Акрамя таго, старшыня Дзяржкаммаёмасці падзяліўся вынікамі работы за 2025 год. «Камітэтам спрошчаны працэдуры па дзяржрэгістрацыі аб’ектаў нерухомасці. З’явілася такое паняцце, як экстэрытарыяльнасць. Грамадзяніну не абавязкова здзяйсняць здзелку там, дзе знаходзіцца аб’ект нерухомасці. Усё гэта можна зрабіць экстэрытарыяльна, гэта значыць там, дзе яму зручна. У тым ліку здзелкі з аб’ектамі нерухомасці ажыццяўляюцца ў рэжыме анлайн, дзе прадавец знаходзіцца ў адным горадзе, а пакупнік — у іншым», — расказаў ён.

«На працягу мінулага года актыўна ішла работа над унясеннем змяненняў у зямельнае заканадаўства, над карэкціроўкай Кодэкса аб Зямлі. Прайшло ўжо першае чытанне, засталося наперадзе другое. Дадзеным законапраектам спрашчаюцца некаторыя вельмі важныя рэчы: будзе прадугледжана магчымасць прадастаўлення растэрміноўкі па легалізацыі зямель, вызваляюцца ад выплаты за легалізацыю пэўныя катэгорыі грамадзян і асобныя юрыдычныя асобы. Ён змяшчае вельмі шмат навэл, якія былі выкліканыя непасрэдна і патрабаваннямі кіраўніка дзяржавы, і задачамі ўрада, і тымі момантамі, якія дыктавала само жыццё», — растлумачыў старшыня Дзяржкаммаёмасці.

Акрамя таго, з 1 студзеня 2026 года ўведзены ў прамысловую эксплуатацыю Нацыянальны геапартал. «Гэта работа не аднаго дзесяцігоддзя. Партал дазваляе кожнаму грамадзяніну атрымаць інфармацыю аб зямельным участку. Ён змяшчае досыць вялікі набор метаданых, дзе карыстальнік можа атрымаць інфармацыю аб наяўнасці навучальных, медыцынскіх устаноў, атрымаць гістарычныя факты аб спаленых вёсках, наяўнасці знакавых архітэктурных, культурных аб’ектаў, помніках Вялікай Айчыннай вайны. Зараз работа будзе працягнутая для таго, каб як мага больш насыціць партал інфармацыйнымі метаданымі. Тым самым мы ствараем візітную картку нашай краіны. У ім любы карыстальнік, нават з-за мяжы, зможа атрымаць інфармацыю аб нашай краіне», — падзяліўся Віталь Нявера.

Яшчэ адным ключавым момантам для ведамства стала стварэнне рэестра маёмасці Саюзнай дзяржавы. У студзені ён запушчаны ў прамысловую эксплуатацыю. Дадзены прадукт быў распрацаваны Нацыянальным кадастравым агенцтвам.