Праграма міжнароднага семінара, прымеркаванага Сусветнаму дню аховы працы, уключае два змястоўныя блокі — практычны і дыскусійны.
Удзельнікі знаёмяцца з лепшымі практыкамі на прадпрыемствах будаўнічай галіны (ДВА «Мінскбуд» і ААТ «БЕЛГІПС»): як сёння навучаюць спецыялістаў па ахове працы, якія тэхналогіі дапамагаюць зніжаць рызыкі і як фарміруецца культура бяспекі. Асобны пункт праграмы — наведванне аднаго са значных аб’ектаў сталіцы, якія будуюцца, — Нацыянальнага гістарычнага музея, — дзе ўдзельнікі пазнаёміліся з арганізацыяй працоўных месцаў і вытворчых працэсаў з улікам усіх патрабаванняў бяспекі.
Ключавыя пытанні будуць вынесены на пленарнае пасяджэнне. У цэнтры ўвагі — змены ў заканадаўстве па ахове працы, патрабаванні прамысловай бяспекі пры эксплуатацыі грузапад’ёмных кранаў, а таксама роля дзяржаўнага будаўнічага нагляду ў сістэме забеспячэння бяспекі працы. Акрамя таго, удзельнікі абмяркуюць падыходы Міжнароднай федэрацыі будаўнічых і дрэваапрацоўчых рабочых (UITBB) па пытаннях аховы працы і тэхнікі бяспекі ў сусветнай будаўнічай галіне. Сваім практычным вопытам таксама падзеляцца расійскія калегі.
Асобны акцэнт у праграме семінара зроблены на арганізацыі бяспечнага выканання работ на вышыні. Актуальнасць тэмы абумоўлена яшчэ і тым, што з 26 красавіка набываюць моц новыя правілы. Змяненні накіраваны на гарманізацыю патрабаванняў з сучаснымі міжнароднымі стандартамі і арыентаваны перш за ўсё на ацэнку прафесійных рызык.
У ліку ключавых пытанняў — дакладнае размеркаванне адказнасці за бяспеку, абавязковая наяўнасць стацыянарных кропак мацавання на будаўнічых аб’ектах (яшчэ на этапе праектавання), а таксама сістэма допуску работнікаў па групах. Такі падыход дазваляе загадзя пабудаваць бяспечны працэс і знізіць верагоднасць няшчасных выпадкаў. Разбор гэтых і іншых новых нормаў — пад асаблівай увагай удзельнікаў.
«Сёння пытанні аховы працы не замыкаюцца выключна на выкананні заканадаўства. Размова ідзе аб фарміраванні ўстойлівай культуры бяспекі на кожным рабочым месцы. Гэта сістэмная работа, якая патрабуе комплекснага падыходу: ад якаснага навучання работнікаў да ўкаранення сучасных тэхналогій кіравання рызыкамі і пастаяннага аналізу вытворчых працэсаў. Важна не проста рэагаваць на магчымыя сітуацыі, а папярэджваць іх. Пры такіх падыходах можна дабіцца рэальнага зніжэння траўматызму і стварыць умовы, пры якіх бяспечная праца становіцца нормай, а не выключэннем. Таму пры арганізацыі форуму мы ў першую чаргу рабілі акцэнт на практычную частку. Нам важна прадэманстраваць калегам новыя тэхналогіі, метады і сучасныя рашэнні пры ўзвядзенні аб’ектаў рознай накіраванасці. Наглядна прадэманстраваць: будаваць па-новаму — значыць, перш за ўсё будаваць бяспечна», — расказаў Дзмітрый Прасвіракоў, старшыня Беларускага прафсаюза работнікаў будаўніцтва і прамысловасці будаўнічых матэрыялаў.
Пабываўшы на будаўнічых аб’ектах сталіцы, старшыня прафсаюза будаўнікоў Краснадарскага краю РФ Сяргей Крывушычаў адзначыў, наколькі карысна і цікава было пазнаёміцца з сучасным абсталяваннем і метадамі абароны, якія выкарыстоўваюцца на будпляцоўках. Удзельнік выказаў намеры рэкамендаваць іх прымяненне на расійскіх прадпрыемствах.
Па выніках мерапрыемства плануецца прыняцце сумесных рэкамендацый, накіраваных на далейшае ўдасканаленне сістэмы аховы працы ў будаўнічай галіне.
Алена КРАВЕЦ
