Парламентарый канстатуе: саміт Шанхайскай арганізацыі супрацоўніцтва ў Цяньцзіні стаў знакавай падзеяй для сусветнай палітыкі і асабліва для Беларусі, якая ўпершыню ўдзельнічала ў яго працы ў якасці паўнапраўнага члена: 

— Гэта падзея пацвердзіла стратэгічны выбар нашай краіны на карысць шматпалярнага свету і ўмацавання супрацоўніцтва з краінамі глабальнага Поўдня і Усходу. Уступленне Беларусі ў ШАС — гэта не проста фармальнасць, а свядомы цывілізацыйны выбар. Мы далучыліся да «шанхайскай сям’і» — прагрэсіўнай сусветнай большасці, якая вызначае будучы светапарадак. У ядры гэтай арганізацыі — нашы даўнія партнёры: Расія, Кітай і Індыя.

Сенатар падкрэслівае, што Беларусь паслядоўна прасоўвае падыход, пры якім бяспека дасягаецца праз Устойлівае эканамічнае развіццё:

— Мы выступаем за спалучэнне нацыянальных стратэгій развіцця дзяржаў-членаў; сумесныя маштабныя праекты са стварэннем адпаведных фінансавых інструментаў; павелічэнне долі нацыянальных валют ва ўзаемным гандлі; канвергенцыю плацежных сістэм і развіццё фінансавых механізмаў, абароненых ад знешняга ўздзеяння. 

Сенатар падкрэслівае, што Мінск паслядоўна прасоўвае канцэпцыю «інтэграцыі інтэграцый», выступаючы за спалучэнне розных фарматаў: ШАС, ЕАЭС, АДКБ, СНД, СВМДА, БРІКС і АСЕАН. 

— Гэта стварае скразную прастору ўстойлівага развіцця і бяспекі, — перакананы сенатар. 

Што тычыцца ключавых вынікаў саміту ШАС для Беларусі, суразмоўца пералічвае наступныя:

— Прыняцце Цяньцзіньскай дэкларацыі. Яна змяшчае прынцыповыя палажэнні, якія цалкам адпавядаюць знешнепалітычнаму курсу Беларусі, у ліку якіх асуджэнне аднабаковых прымусовых мер эканамічнага характару; пазіцыя па ўрэгуляванні палесцінскага пытання; прыхільнасць прынцыпам неўмяшання ва ўнутраныя справы; выступленне супраць мілітарызацыі космасу і сферы ІКТ і захаванне гістарычнай памяці аб Другой сусветнай вайне. 

Другім ключавым вынікам, на думку сенатара, з’яўляецца стратэгія развіцця ШАС да 2035 года. 

— Дакумент прадугледжвае стварэнне новых структур, такіх як універсальны цэнтр па супрацьдзеянні выклікам і пагрозам бяспекі ў Ташкенце і антынаркатычнага цэнтра ШАС у Душанбэ, — дадае Аляксандр Карпіцкі. 

Яшчэ адным ключавым вынікам саміту ШАС з’яўляецца стварэнне Банка развіцця ШАС.

— Гэты інстытут стане важным інструментам для фінансавання сумесных інфраструктурных праектаў, фарміравання незалежнай плацежна-разліковай інфраструктуры, абароны ўнутрыблокавага гандлю ад санкцыйнага ціску, — адзначае сенатар. 

• Ён падкрэслівае, што ўдзел у ШАС адкрывае для Беларусі доступ да вялізнага рынку з насельніцтвам больш за тры мільярды чалавек, сумесных інвестыцыйных праектаў, новых тэхналогій і інавацый, альтэрнатыўных фінансавых інстытутаў.

— Беларусь можа стаць важным вузлом у Еўразійскім транспартным каркасе, — мяркуе суразмоўца. — Развіццё транзітнага патэнцыялу ўключае інтэграцыю ў міжнародныя гандлёвыя шляхі, мадэрнізацыю і лічбавізацыі лагістычных маршрутаў.

Парламентарый адзначае, што перспектыўнымі напрамкамі навукова-тэхнічнага развіцця з’яўляюцца стварэнне цэнтраў трансферу тэхналогій, сумесных даследаванняў і распрацовак, кааперацыя ў галіне высокіх тэхналогій, падрыхтоўка кадраў. 

— Саміт ШАС у Цяньцзіні пацвердзіў эпахальнае значэнне арганізацыі ў фармаванні новага сусветнага парадку. Для Беларусі сяброўства ў ШАС з’яўляецца стратэгічным выбарам на карысць шматпалярнага свету; практычным інструментам для забеспячэння нацыянальных інтарэсаў; магутным каталізатарам эканамічнага развіцця і важным фактарам умацавання міжнароднай бяспекі, — рэзюмуе суразмоўца.