Флагман айчыннага хакея — клуб «Дынама-Мінск» стаў яшчэ бліжэй да сваіх аматараў. Сучасная, прасторная фірмовая крама клуба адкрылася ў Мінску. За апошнія гады сталічны клуб значна прыбавіў у спартыўным і медыйным плане, таму выклікае яшчэ больш цікавасці ў аматараў. А сваю аматарскую сям’ю «зубры» цэняць.
Як заўважыў намеснік старшыні Пастаяннай камісіі Савета Рэпублікі па адукацыі, навуцы культуры і сацыяльным развіцці Дзмітрый Баскаў, на вуліцах становіцца ўсё больш людзей з атрыбутыкай хакейнага клуба. І гэты трэнд неабходна падтрымліваць, з чым клуб выдатна спраўляецца.
«Прафесійны спорт у шырокім сэнсе — гэта не толькі матчы, забегі, секунды і сантыметры. Спорт ужо даўно выходзіць за межы спартыўных пляцовак, а хакей — гэта нават больш, чым проста спорт. Гэта страсць, якая аб’ядноўвае мільёны людзей па ўсёй краіне. Гэта эмоцыі, якія мы перажываем разам з камандай на кожным матчы. Гэта, канешне ж, гонар за нашых гульцоў, за іх майстэрства і самаадданасць. Але гэта немагчыма без заўзятараў на трыбунах. Кожны спартсмен гуляе дзеля сваіх аматараў. І выдатна, што хакейны клуб „Дынама“ гэта разумее і стварае ўсе ўмовы, каб аматар адчуваў сябе неабходным. І абноўлены фан-шоп — гэта пацверджанне таго, што хакейны клуб „Дынама-Мінск“ думае аб сваім аматары, стварае для яго лепшыя ўмовы», — адзначыў сенатар.
Старшыня Беларускай Федэрацыі хакея Аляксандр Багдановіч заўважыў, што «Дынама-Мінск» як флагман нашага хакея аб’яднаў вакол сябе без выключэнняў усю краіну. На матчы з’язджаюцца людзі з самых аддаленых куткоў краіны, а квіткі ўжо даўно разлятаюцца за лічаныя дні, калі не гадзіны. «Важна даваць заўзятарам магчымасць адчуць сябе часткай гэтай прыгожай клубнай гісторыі. Адкрыццё абноўленага фан-шопа-гэта не проста касметычны рамонт або змена шыльды. Гэта сімвал таго, як развіваецца наш хакей, як расце любоў аматараў да каманды, як мацнее сувязь паміж клубам і яго фанатамі. Гэта магчымасць стаць яшчэ бліжэй да каманды, якую мы ўсе любім, і месца, адкуль вы можаце панесці часцінку той неверагоднай атмасферы, якая пануе на трыбунах „Мінск-Арэны“», — адзначыў ён. Аляксандр Багдановіч звярнуў увагу, што мінулы сезон «Дынама-Мінск» правёў выдатна і ад гэтага сезону усе, у тым ліку, канешне, і аматары чакаюць такіх жа яскравых эмоцый.
Падарункам аматарам да новага сезону абноўлены фан-шоп назваў і генеральны дырэктар хакейнага клуба «Дынама-Мінск» Арцём Каркоцкі. «Абноўлены фан-шоп увасабляе стан нашага клуба — мы сталі большымі, мы сталі мацнейшымі. І нам трэба пашыраць сваю прысутнасць, быць яшчэ больш крэатыўнымі і прыцягваць розную аўдыторыю», — растлумачыў ён.
Валерыя СЦЯЦКО
Фота ХК «Дынама-Мінск»
