У першы дзень візіту, 14 красавіка, кіраўнік беларускага знешнепалітычнага ведамства быў прыняты Прэзідэнтам Рэспублікі Казахстан Касым-Жамартам Такаевым. Адбыўся абмен думкамі аб стане і перспектывах развіцця двухбаковага супрацоўніцтва паміж Беларуссю і Казахстанам, а таксама па актуальных пытаннях міжнароднага парадку дня. Максім Рыжанкоў таксама перадаў кіраўніку Казахстана прывітанне і самыя добрыя пажаданні ад Прэзідэнта Рэспублікі Беларусь Аляксандра Лукашэнкі.

Міністр павіншаваў з паспяховым правядзеннем агульнанацыянальнага рэферэндуму па прыняцці новай Канстытуцыі ў Рэспубліцы Казахстан і адзначыў высокі давер грамадзян да праводзімага прэзідэнтам курсу, накіраванага на мадэрнізацыю краіны і ўмацаванне дзяржаўнасці.

Адбыліся таксама перагаворы Максіма Рыжанкова з міністрам замежных спраў Казахстана Ермекам Кашэрбаевым. Бакі дэталёва абмеркавалі шырокі спектр пытанняў двухбаковага і шматбаковага парадку дня, а таксама графік маючых адбыцца ўзаемных візітаў на высокім і вышэйшым узроўнях. Асаблівая ўвага нададзена развіццю гандлёва-эканамічнага супрацоўніцтва. У ходзе перагавораў адзначаны высокі ўзровень узаемадзеяння па лініі знешнепалітычных ведамстваў Беларусі і Казахстана. Максім Рыжанкоў запрасіў свайго казахстанскага калегу наведаць Рэспубліку Беларусь з афіцыйным візітам.

Кіраўнікі знешнепалітычных ведамстваў прадметна разгледзелі бягучую сітуацыю на сусветнай арэне, асобна спыніліся на ўзаемадзеянні Беларусі і Казахстана ў рамках міжнародных арганізацый і інтэграцыйных аб’яднанняў, перш за ўсё ААН, СНД, ШАС і БРІКС. Была адзначана блізкасць падыходаў да выбудоўвання дыялогу на шматбаковых пляцоўках, пацверджана ўзаемнае імкненне да больш справядлівага, шматпалярнага светаўладкавання.

У гэты ж дзень Максім Рыжанкоў наведаў павільён ЭКСПА, цяпер — міжнародны тэхнапарк IT-стартапаў «Астана-Хаб», дзе азнаёміўся з лічбавай інфраструктурай тэхнапарка, шэрагам распрацовак у сферы штучнага інтэлекту і стартап-праектаў, што рэалізуюцца ў Казахстане. Кіраўнік беларускага знешнепалітычнага ведамства высока ацаніў перспектывы двухбаковага супрацоўніцтва ў гэтай сферы.