З 15 снежня дзяржаўная лясная ахова перайшла на ўзмоцнены рэжым работы. «Праводзяцца рэйдавыя мерапрыемствы па папярэджанні незаконнай высечкі дрэў. У склад груп уваходзяць як работнікі лясной гаспадаркі, так і прадстаўнікі ДАІ, Дзяржаўнай інспекцыі аховы жывёльнага і расліннага свету пры Прэзідэнце Рэспублікі Беларусь. У рамках гэтых палявых мерапрыемстваў будуць ажыццяўляцца інфармацыйная і растлумачальная работа, штодзённыя рэйды побач з месцамі, што найчасцей падвяргаюцца незаконнай высечцы — у хвойных маладняках, хвойных насаджэннях каля населеных пунктаў і садовых таварыстваў, побач з аўтадарогамі», — расказаў Віктар Звяртоўскі. Ён таксама падкрэсліў, што дзяржаўная лясная ахова надзелена правам спынення транспартных сродкаў з мэтай праверкі на прадмет вывазу незаконна высечаных дрэў.

«У дапамогу дзяржлесахове і тэхнічныя сродкі: для своечасовага выяўлення парушальнікаў і ўстанаўлення фактаў незаконнай высечкі будзе выкарыстоўвацца больш за 2 тыс. камер фота- і відэафіксацыі», — адзначыў Віктар Звяртоўскі.

У 2024 годзе дзяржаўнай лясной аховай было праверана больш за 700 участкаў для нарыхтоўкі навагодніх дрэў, больш за 600 дазвольных дакументаў, якія даюць права на нарыхтоўку, каля 250 пунктаў продажу. Па выніках кантрольных мерапрыемстваў было складзена 9 пратаколаў аб адміністрацыйным правапарушэнні.

Як паведамлялася раней, фізічнай асобе, якая ажыццявіла незаконную высечку елкі, пагражае штраф да 30 базавых велічынь, індывідуальнаму прадпрымальніку — ад 20 да 100 базавых велічынь, юрыдычнай асобе — ад 50 да 300 базавых велічынь. Да штрафу дадасца сума шкоды, нанесенай навакольнаму асяроддзю, і кошт ссечанага дрэва.