Аб гэтым Старшыня Палаты прадстаўнікоў Ігар СЕРГЯЕНКА паведаміў на сустрэчы з кіраўніцтвам Брэсцкай вобласці, актывам Пінска і шэрагу раёнаў Брэсцкай вобласці, на якой таксама прысутнічалі дэпутаты, выбраныя ад Брэстчыны. У рамках рабочай паездкі ў Пінск спікер наведаў Пінскую міжраённую інспекцыю аховы жывёльнага і расліннага свету, Палескі дзяржаўны ўніверсітэт, прадпрыемства «1 АК-Пластык». Напярэдадні Старшыня Палаты прадстаўнікоў азнаёміўся з дзейнасцю аднаго з найбуйнейшых пінскіх прадпрыемстваў, вядомага ва ўсёй краіне, — ЗАТ «Холдынгавая кампанія «Пінскдрэў».
Падчас сустрэчы з кіраўніцтвам Брэсцкай вобласці, актывам Пінска і раёнаў вобласці Ігар Сергяенка звярнуў увагу на важнасць вывучэння правапрымяняльнай практыкі на месцах, што дае магчымасць улічыць меркаванне, якое фарміруецца непасрэдна ў канкрэтных рэгіёнах. Спікер адзначыў, што прыкладаў прадуктыўнага ўзаемадзеяння даволі шмат. У прыватнасці, пры падрыхтоўцы законапраекта, які датычыцца абароны праў дзяцей, улічвалася меркаванне педагагічнай супольнасці.
Старшыня Палаты прадстаўнікоў праінфармаваў, што ў цяперашні час вядзецца работа над законапраектам «Аб змяненні законаў па пытаннях нарматворчай дзейнасці». «Самі выйшлі з ініцыятывай, каб надзяліць Палату прадстаўнікоў кантрольнымі функцыямі, як рэалізуецца той ці іншы закон у падзаконных актах», — удакладніў ён.
Парламенцкі кантроль у гэтай частцы, па словах Ігара Сергяенкі, будзе ўзмацняцца, таму адным з кірункаў удасканалення дзейнасці з’яўляецца пакетны прынцып унясення законапраектаў у Палату прадстаўнікоў. У якасці прыкладу спікер прывёў работу над законапраектам «Аб змяненні законаў па пытанні дзейнасці органаў і падраздзяленняў па надзвычайных сітуацыях». Па гэтай тэме на базе Універсітэта грамадзянскай абароны праводзіўся выязны семінар. І калі праект закона прадстаўляўся ў парламенце, у профільнага міністра ўжо былі адпрацаваны праекты пастаноў урада, якія пасля прыняцця закона павінны былі ісці за ім і падпісвацца.
Ігар Сергяенка праінфармаваў, што за перыяд работы трэцяй сесіі Палаты прадстаўнікоў, якая пачала працаваць 16 верасня 2025 года, прынята 50 закона-праектаў. Яны датычацца пытанняў ваеннай бяспекі і абароны, дзейнасці МНС, прадастаўлення пазык, энергазберажэння, натарыяльнай дзейнасці, пенсіённага забеспячэння, абароны праў грамадзян Беларусі і Расіі, бюджэтна-падатковага пакета і іншага. У бягучы час у парламенцкім партфелі знаходзіцца 19 праектаў, іх колькасць расце.
У найбліжэйшы час будуць разгледжаны законапраекты, якія датычацца пытанняў зямельных адносін, лізінгавай дзейнасці, дзяржаўнай рэгістрацыі, ліквідацыі суб’ектаў гаспадарання і іншых. Ігар Сергяенка падкрэсліў, што за кожным законапраектам замацаваны канкрэтныя дэпутаты, якія ўзае мадзейнічаюць з міністэрствамі, камітэтамі. Дэпутаты ўключаюцца ў работу яшчэ да паступлення законапраекта ў Палату прадстаўнікоў.
Асобна спікер спыніўся на міжпарламенцкай дзейнасці, якая вядзецца на розных міжнародных пляцоўках, і анансаваў сур’ёзнае мерапрыемства па лініі Парламенцкага сходу Саюза Беларусі і Расіі, якое адбудзецца сёлета, — другі міжнародны форум «Вялікая спадчына — агульная будучыня». Форум плануецца правесці на тэрыторыі Брэста. Першае такое мерапрыемства летась адбылося ў Валгаградзе.
У цэлым, па словах Старшыні Палаты прадстаўнікоў, арыенціры ў дзейнасці ўсіх дзяржаўных органаў, уключаючы Нацыянальны сход, вызначаны ў Пасланні Прэзідэнта беларускаму народу і парламенту, Праграме сацыяльна-эканамічнага развіцця краіны на пяцігодку. Зыходзячы з гэтага парламентарыі і будуюць сваю работу.
Паводле БелТА
