Дэпутат — праваднік інтарэсаў грамадства 

— Асаблівасць маёй акругі заключаецца ў тым, што на яе тэрыторыі амаль няма буйных прамысловых прадпрыемстваў, — адзначае суразмоўца. — Аднак тут размяшчаецца шмат сацыяльных аб’ектаў сталіцы: установы адукацыі, аховы здароўя. Мы аказваем ім садзейнічанне, цесна камунікуем.

Спектр пытанняў, з якімі звяртаюцца выбаршчыкі да дэпутата, даволі шырокі.

— Пытанні звычайна маюць жыллёва-камунальны, бытавы альбо грамадзянска-прававы характар, — гаворыць Аляксандр Паўлавіч. — Трэба разумець, што чалавек, які трапіў у складаную жыццёвую сітуацыю, часта не мае дастатковых матэрыяльных сродкаў, каб аплачваць паслугі адваката, а нярэдка і проста не ў сілах вырашыць сваё пытанне, таму што не ведае, да каго звярнуцца. У гэтых выпадках дэпутат выступае своеасаблівым правадніком інтарэсаў грамадзян у нашу дзяржаўную сістэму.

Як прыклад — адзін з нядаўніх выпадкаў. Нядобрасумленныя сваякі спрабавалі пазбавіць пажылую жанчыну спадчыны. Кватэра ёй дасталася ад маці, аднак у апошні момант адзін са сваякоў апублікаваў завяшчанне, якое пажылая жанчына нібыта падпісала незадоўга да смерці (ва ўзросце 100 гадоў). Мы далі адпаведныя рэкамендацыі, аказалі прававую дапамогу, пасля чаго рашэннем суда завяшчанне было прызнана несапраўдным у сувязі з тым, што маці не знаходзілася ў належным стане здароўя, каб падпісваць дакумент свядома. Хачу адзначыць, што ў гэтых заблытаных юрыдычных выпадках, з якімі нярэдка прыходзяць грамадзяне, мы маем вельмі станоўчы вопыт супрацоўніцтва з Беларускай рэспубліканскай калегіяй адвакатаў, якая, дарэчы, аказвае бясплатныя кансультацыі пэўным катэгорыям грамадзян. Напрыклад, інвалідам. Аб гэтых карысных паслугах не ўсе нашы людзі ведаюць.

Хацелася б яшчэ дадаць, што мы актыўна працуем і з прадпрымальніцкай супольнасцю. Напрыклад, нядаўна атрымалі зварот педагогаў і бацькоў вучняў сталічнай сярэдняй школы № 129, што ў Ленінскім раёне. Яны папрасілі садзейнічання ў абсталяванні варкаўт-пляцоўкі. Мы гэту ініцыятыву паспяхова рэалізавалі з падтрымкай сацыяльна адказнага бізнесу.

Асобную ўвагу дэпутат звярнуў на мерапрыемствы інфармацыйна-асветніцкага характару, якія праводзяцца ў рамках адзіных дзён інфармавання ў працоўных калектывах.

— Дзякуючы СМІ я досыць вядомы дэпутат і палітычны дзеяч, таму звароты паступаюць пастаянна. Кожны чацвер, а бывае, што і ў іншыя дні тыдня, калі ёсць такі запыт, я праводжу сустрэчы з выбаршчыкамі. 

У працоўных калектывах мы расказваем аб спецыфіцы прыняцця дзяржаўных рашэнняў, асноўных прынцыпах знешняй і унутранай палітыкі Рэспублікі Беларусь, міжнароднай абстаноўцы.

Не толькі пытанні, але і прапановы

— А ці звяртаюцца выбаршчыкі да вас з прапановамі па ўдасканаленні заканадаўчай базы?

— Вядома, такія звароты ёсць. Напрыклад, некаторыя прапановы датычацца пытанняў захавання гістарычнай памяці аб подзвігу беларускага народа ў Вялікай Айчыннай вайне. А яшчэ сацыяльнай палітыкі, прадпрымальніцтва, праваахоўнай дзейнасці, працы адвакатуры, судоў. Парламентарыі ўважліва ставяцца да ўсіх прапаноў. Але трэба разумець, што, вядома, не ўсе ідэі нашых грамадзян могуць быць рэалізаваныя. Часта яны дубліруюць ужо існуючыя нормы заканадаўства, нярэдка супярэчаць прынятым нарматыўна-прававым актам, а часам выглядаюць проста нерэалістычна. Але ў гэтым шэрагу ёсць сапраўды слушныя прапановы, якія ўважліва вывучаюцца дэпутацкім корпусам і выкарыстоўваюцца ў заканадаўчай рабоце. Калі прапановы грамадскасці не адносяцца да майго непасрэднага профілю, перанакіроўваю ў іншыя камісіі для разгляду.

Напрыклад, ідэя, якая не прыўнесла, здавалася б, нічога новага ў заканадаўства, але дапамагла чалавеку разабрацца ў сітуацыі: грамадзянін звярнуўся з просьбай аб неабходнасці прыняцця заканадаўчай нормы, якая б прадугледжвала неабходнасць узгаднення рамонтных работ у кватэры з суседзямі. Зразумела, што ў такім выглядзе гэта прапанова прынятая быць не можа, таму што выкліча вострыя сацыяльныя канфлікты паміж людзьмі. Але мы патлумачылі грамадзяніну, што на сёння ўжо існуюць пэўныя нормы, якія прадугледжваюць графік правядзення рамонтных работ. Забаронена праводзіць шумныя рамонтныя работы ў вячэрні час і ў выхадныя дні. Цяпер грамадзянін ведае свае правы і кантралюючыя інстанцыі, куды можна звярнуцца ў выпадку парушэнняў.

— Часткай вашай дзейнасці з’яўляюцца прыёмы грамадзян, сустрэчы з працоўнымі калектывамі, узаемадзеянне з моладдзю. Якая з форм вам здаецца найбольш эфектыўнай?

— Нельга адмаўляцца ад любога з вышэйпералічаных інструментаў. Больш за тое, мы павінны ўлічваць рэальнасць, у якой жывём. Я маю на ўвазе лічбавізацыю.

Практычна ўсе мы ў той ці іншай ступені ахоплены гэтымі працэсамі. Падтрымлівае актыўную камунікацыю ў сацыяльных сетках абсалютная большасць грамадзян Беларусі. Калі мы гаворым пра моладзь, то тут ахоп дасягае амаль 100 %. У гэтай сувязі неабходна, акрамя традыцыйных форм дэпутацкай дзейнасці, якія вельмі важныя, улічваць і асаблівасці часу. На мой погляд, дэпутаты павінны быць актыўныя ў сацыяльных сетках, мусяць улічваць спецыфіку інтэрнэт-прасторы нашай краіны. Назіраецца тэндэнцыя да росту выкарыстання Telegram, таму варта асвойваць гэты месенджар, ствараць уласныя каналы і выказваць меркаванне па тых пытаннях, у якіх дэпутат кампетэнтны.

Пагаворым і пра TіkTok. Мы бачым, што гэта платформа ўсё часцей выкарыстоўваецца людзьмі не толькі ў кантэксце нейкіх забаўляльных ролікаў або размяшчэння інфармацыі пра асабістае жыццё, а ў фармаце, які я называю «дабро паскардзіцца» — калі грамадзяне запісваюць ролікі на вострасацыяльныя тэмы. Некаторыя матэрыялы маюць надуманы характар або не адпавядаюць рэчаіснасці. У гэтым трэба разбірацца. Лічу, што яшчэ адна важная функцыя дэпутата — інфармаваць выбаршчыкаў аб рэальнай карціне спраў. Трэба працаваць комплексна па ўсіх кірунках, тады будзе годны вынік.

Людзі падтрымліваюць Прэзідэнта

— Аляксандр Паўлавіч, вы з’яўляецеся членам Пастаяннай камісіі па міжнародных справах Палаты прадстаўнікоў. Ці хвалюе людзей міжнародны парадак дня?

— Падчас сустрэч у працоўных калектывах, вядома, гучаць пытанні адносна знешняй палітыкі. Яны сапраўды цікавяць суайчыннікаў. Беларусы ў абсалютнай большасці падтрымліваюць знешнепалітычны курс дзеючай улады, міралюбівую знешнюю палітыку, меры па ўмацаванні абараназдольнасці нашай краіны. Людзі ўсведамляюць каштоўнасць міру і цалкам падзяляюць падыходы нашага Прэзідэнта па максімальным дыстанцыраванні ад узброеных канфліктаў і недапушчэнні ўцягвання Беларусі ў вайну. 

Яна ВАЛАСАЧ
Фота з асабістага архіва героя