Аб тым, якое надвор’е прынясе ў краіну цыкланічны віхар «Рапунцэль», расказалі ў Рэспубліканскім цэнтры па гідраметэаралогіі, кантролі радыеактыўнага забруджвання і маніторынгу навакольнага асяроддзя Мінпрыроды, паведамляе SB.by.
«Пагодны сцэнарый гэтага тыдня будзе вельмі заблытаным, не горш за захапляльныя сюжэты дыснэеўскіх мультфільмаў. Беларусь апынецца ва ўладзе цыкланічнага віхра „Рапунцэль“ з цэнтрам над поўначчу Еўропы, атмасферныя франты ад якога, нібы доўгія валасы прынцэсы, зачыненай у высокай вежы, дацягнуцца і да тэрыторыі нашай краіны. Аднак, у адрозненне ад вылечвальнай здольнасці валасоў прынцэсы, яны прынясуць халоднае з ападкамі надвор’е, што ў спалучэнні з моцным парывістым ветрам узмоцніць узровень дыскамфорту», — расказалі ў Белгідрамеце.
Пры гэтым там дадалі, што ўжо да канца тыдня скандынаўскі антыцыклон пачне выпраўляць сітуацыю: зменшыць колькасць нябеснай вільгаці і аслабіць вецер.
