Культура, адукацыя, эканоміка — гэта тры складнікі праекта «Славянскі фестываль — Беларускі гарадок», які стартаваў у горадзе Наньтун (Кітайская Народная Рэспубліка). Рэалізуецца ён пры садзейнічанні Федэрацыі прафсаюзаў Беларусі сумеснымі намаганнямі міністэрстваў культуры, адукацыі Беларусі і муніцыпальных органаў улады, бізнес-структур КНР.
У рамках праекта на доўгатэрміновай аснове на спецыяльна створаных пляцоўках у кітайскіх гарадах Наньтун і Нанкін будуць арганізаваны кірмашы-продажы рамесных вырабаў беларускіх майстроў. Шырока на гэтай пляцоўцы плануецца прадставіць і беларускія харчовыя і нехарчовыя тавары, у тым ліку сельскагаспадарчую прадукцыю. А для знаёмства з беларускай культурай прадугледжана штодзённае выступленне творчых калектываў нашай краіны.
Пры гэтым, акрамя непасрэдна выставак народных промыслаў, у рамках праекта сумеснымі намаганнямі беларускага і кітайскага бакоў будуць створаны беларуская навучальная база па мастацтве і Дом рамеснікаў — гэта стратэгічны крок, які дазволіць кітайскім грамадзянам вывучаць жывапіс, рамёствы і музыку непасрэдна ў носьбітаў традыцый, што забяспечыць рэальнае культурнае ўзаемаўзбагачэнне.
У час запуску праекта з боку Федэрацыі прафсаюзаў Беларусі было адзначана, што гэта ініцыятыва — не проста «вітрына» або кірмаш, а яшчэ адна магчымасць для ўмацавання доўгатэрміновага і даверлівага дыялога. Нацыянальны прафцэнтр Беларусі падтрымлівае і садзейнічае рэалізацыі гэтага праекта, бо менавіта чалавек працы — галоўны герой «Славянскага гарадка»: «Калі вы пакаштуеце наш хлеб, удыхняце водар ільнянога палатна, убачыце бляск крышталю — ведайце: за ўсім гэтым стаіць не проста тэхналогія. За гэтым стаяць рукі і душа. Беларусы гістарычна з’яўляюцца нацыяй працаўнікоў. Стаўка ў нас заўсёды рабілася на адукацыю, на інжынерную думку і на ўменне працаваць якасна. Гэты інтэлектуальны і прафесійны патэнцыял напрамую канвертуецца ў надзейнасць і якасць усяго, што мы вырабляем. І прафсаюзы як галоўны абаронца чалавека працы з гонарам прадстаўляюць на гэтай пляцоўцы плён рук нашых работнікаў. Платформа, якую мы адкрываем, дазволіць дэманстраваць дасягненні нашых працоўных».
Яшчэ адзін складнік гэтага беларуска-кітайскага праекта — пашырэнне ўзаемадзеяння ў сферы адукацыі. У Наньтуне адкрыюць кітайска-беларускі клас для абітурыентаў, якія плануюць паступленне ў вышэйшыя навучальныя ўстановы Беларусі. У сваю чаргу ў нашай краіне будзе створаны цэнтр па аказанні ўсебаковай падтрымкі кітайскім студэнтам, якія вучацца ў Беларусі, а таксама па прадастаўленні кансультацыйных, інфармацыйных і іншых паслуг беларускім школьнікам і студэнтам па пытаннях навучання ў Кітаі.
Алена КРАВЕЦ
