У лютым заканчваецца другі этап рэпетыцыйнага тэсціравання, а рэпетыцыя цэнтралізаванага экзамену ўжо адбылася. Таксама гэтымі днямі ў Мінску праходзіць маштабная спецыялізаваная выстаўка «Адукацыя і кар’ера». Усе гэтыя прыкметы красамоўна сведчаць аб тым, што вельмі хутка пачнецца самая гарачая пара ў выпускнікоў школ і абітурыентаў.
— Адразу хачу адзначыць, што ніякіх карэнных глабальных змяненняў у параўнанні з папярэднім навучальным годам не адбылося і ўжо не адбудзецца, — супакойвае старшакласнікаў начальнік упраўлення агульнай сярэдняй і дашкольнай адукацыі Міністэрства адукацыі Ірына КАРЖОВА. — На дадзены момант прыняты ўсе нарматыўна-прававыя акты, якія рэгламентуюць арганізацыю і правядзенне цэнтралізаванага экзамену ў 2026 годзе.
Ірына Уладзіміраўна спынілася на асноўных з іх. Пачнём з дат. Пастановай Міністэрства адукацыі ад 21 жніўня 2025 года № 147 вызначаны даты правядзення цэнтралізаванага экзамену. Першы дзеці будуць здаваць 26 мая, і гэта будзе прадмет па выбары. У пераліку — 14 дысцыплін, сярод іх адна новая — «Гісторыя Беларусі ў кантэксце сусветнай гісторыі».
— Гэты прадмет новы ў пераліку, але зусім не новы для навучэнцаў 11-х класаў, якія вывучалі яго два гады, — удакладняе Ірына Каржова.
29 мая пройдзе другі цэнтралізаваны экзамен па беларускай або рускай мове — на выбар навучэнцаў.
Зверым месца, час і нумар
Як і ў мінулым годзе, выпускнікоў школ для правядзення ЦЭ будуць чакаць 144 пункты, у тым ліку 30 устаноў вышэйшай адукацыі, 57 устаноў агульнай сярэдняй адукацыі і 57 каледжаў. Час прыбыцця ў пункт правядзення цэнтралізаванага экзамену — не пазней чым 30 хвілін да яго пачатку.
Цяпер пра змены. Раней у электроннай базе пры рэгістрацыі ўдзельнікаў цэнтралізаванага экзамену бланка адказаў паказваліся серыя і нумар пашпарта. Аднак некаторыя 11-класнікі па тых ці іншых прычынах мяняюць гэты дакумент.
— Для таго каб яны маглі выкарыстоўваць свае сертыфікаты, якія былі раней ідэнтыфікаваныя па серыі і нумары пашпарта, з гэтага навучальнага года мы ўвялі ідэнтыфікацыю кожнага выпускніка па ідэнтыфікацыйным нумары. Гэта дазваляе абітурыентам незалежна ад наяўнасці старога ці новага пашпарта выкарыстоўваць тыя сертыфікаты цэнтралізаванага экзамену і цэнтралізаванага тэсціравання, якія яны атрымалі раней, — тлумачыць прадстаўнік Мінадукацыі. — Другая навацыя — мы ўнеслі змены ў інструкцыю правядзення выпрабаванняў і рэгламентавалі калькулятары. Удакладнілі, якія можна выкарыстоўваць пры выкананні экзаменацыйных заданняў па хіміі і фізіцы: гэта просты аднарадковы калькулятар, які дазваляе выконваць толькі арыфметычныя дзеянні (складанне, адніманне, дзяленне, множанне, здабыванне квадратнага кораня з ліку), аперацыі з працэнтамі, вылічэнне адваротнай велічыні, аперацыю змены знака, выконваць аперацыі з адной ячэйкай памяці.
Для асобных груп
Трэцяе змяненне датычыцца толькі асобнай групы выпускнікоў — тых, хто ў 11 класе выкарыстоўваў мабільную прыладу для маніторынгу стану здароўя.
— Такія школьнікі дапускаюцца ў аўдыторыю правядзення ЦЭ з гэтымі прыладамі, — адзначае Ірына Каржова. — Дадатковыя медыцынскія даведкі пры гэтым не спатрэбяцца. Гэта ж катэгорыя выпускнікаў, якім патрабуюцца асаблівыя ўмовы, могуць не прымаць удзел у лёсаванні месцаў для размяшчэння ў аўдыторыі правядзення цэнтралізаванага экзамену. Размяшчэнне такіх навучэнцаў па месцах ажыццяўляе педагагічны работнік, які знаходзіцца ў аўдыторыі, дзе праходзіць цэнтралізаваны экзамен.
У 2026 годзе рэгістрацыя на ЦТ будзе праходзіць з 9 да 22 красавіка. У гэты перыяд абітурыенты могуць падаць заяву анлайн праз сайт РІКВ ці асабіста прынесці іх у пункты тэсціравання. Рэгістрацыя на рэзервовыя дні запланавана з 8 да 11 чэрвеня 2026 года.
Алена ВІНАГРАДАВА.
Фота Лізаветы ГОЛАД.
