«Каб колькасць наведвальнікаў у бібліятэках расла, трэба ствараць цікавыя і камфортныя ўмовы. Напрыклад, нашу бібліятэку наведваюць 1000-1500 чалавек у дзень. З іх толькі 30 % — гэта маленькія дзеці. Мы знялі ўсе абмежаванні, так што да нас прыходзяць усе: і пенсіянеры, і рабочая моладзь, і студэнты, і юныя чытачы», — сказала Роза Султангазіева.

Паводле яе слоў, бібліятэка створана для таго, каб кожны чалавек, незалежна ад узросту, атрымаў тую інфармацыю, якая яму патрэбна. Таму важна яе зручнае месцазнаходжанне і разнастайнасць паслуг і магчымасцяў. Так, у Рэспубліканскай бібліятэцы для дзяцей і юнацтва імя К. Баялінава ёсць бясплатныя камп'ютарныя і моўныя курсы, курсы шыцця і кройкі, курсы акцёрскага майстэрства, тэхнічная лабараторыя, літаратурныя клубы, Расійскі цэнтр, у якім вельмі шмат сучаснай тэхнікі і цікавых, яркіх кніг. 

Акрамя таго, працуе інклюзіўны цэнтр «Клопат», куды прыходзяць дзеці і дарослыя з асаблівасцямі развіцця і абмежаванымі магчымасцямі. Пры гэтым курсы ў іх часта вядуць людзі з інваліднасцю. Напрыклад, 3D-мадэляванню і шахматам для людзей з інваліднасцю па слыху ў бібліятэцы навучае Тылеген Рахматбекаў — пераможца чэмпіянату Азіі-2024 па шахматах сярод людзей з абмежаванымі магчымасцямі. Таксама быў рэалізаваны праект «Белы кій», падчас якога бібліятэка набыла кій для невідушчых і навучала іх знаходзіць шлях у бібліятэку і іншыя сацыяльныя ўстановы.

Роза Султангазіева ўпэўненая, што спецыялісты, якія працуюць у бібліятэках, дапамагаюць дзецям сацыялізавацца ў гэтым хутка зменлівым свеце. Яны вучаць іх хутчэй адаптавацца да новых умоў, заводзіць сяброў, несці карысць грамадству і любіць сваю радзіму.
Дырэктар бібліятэкі падкрэсліла, што гатова падзяліцца сваім вопытам з беларускімі калегамі і абмеркаваць новыя шляхі і кірункі развіцця бібліятэк сёння.