Беларусь і Алжыр у пытаннях свайго гістарычнага развіцця маюць шмат падобнага і на міжнароднай арэне выступаюць з адзіных пазіцый. Пра гэта ў Алжыры заявіў журналістам міністр замежных спраў Беларусі Максім Рыжанкоў, паведамляе БелТА.

«Гэта дзяржава-аднадумец. Фактычна мы выступаем на міжнароднай арэне з адзіных пазіцый. Што датычыцца любых кірункаў: абароны Статута ААН, пабудовы больш справядлівага шматпалярнага свету, за вырашэнне мірным шляхам пытанняў міжнароднага парадку дня», — сказаў міністр.

Па словах Максіма Рыжанкова, пытанні адказнасці еўрапейскіх краін за каланіялізм і за генацыд — гэта таксама адно з сувязных звёнаў агульнай палітыкі Беларусі і Алжыра.

Ён расказаў, што падчас знаходжання ў Алжыры меў магчымасць наведаць мясцовы музей, дзе пачарпнуў для сябе шмат новай інфармацыі адносна барацьбы алжырскага народа за сваю незалежнасць. Прычым гэта адбывалася ўжо ў перыяд пасля Другой сусветнай вайны. «Аказваецца, зусім нядаўна. І нават пазней, чым у нас быў генацыд супраць савецкага і беларускага народа з боку Германіі. Французскія ўлады ў барацьбе за незалежнасць Алжыра фактычна падвергнулі генацыду каля паўтара мільёна чалавек. Гэта глыбокая рана дагэтуль жыве ў алжырскім грамадстве», — адзначыў кіраўнік МЗС.

«Гэта падобна да нашых падыходаў да так званай еўрапейскай дэмакратыі, якая менавіта такімі спосабамі спрабавала прывесці „дэмакратыю“ ў такія краіны, як Беларусь і Алжыр. Таму мы вельмі добра разумеем тэмы развіцця, мы вельмі добра ведаем, што нас чакае там — у „цывілізаванай“ Еўропе. Мы вельмі добра разумеем, што толькі абапіраючыся на ўласныя ўнутраныя сілы, мы можам развівацца. І для свайго развіцця павінны кансалідаваць нацыю і цалкам трымаць пад кантролем усё ўнутранае развіццё. І сацыяльна-эканамічнае, і палітычнае. У гэтым мы падобныя з Алжырам», — заявіў Максім Рыжанкоў.